Rethoricale wercken (1562)

Rethoricale wercken

(1562)–Anthonis de Roovere– rechtenstatus

Auteursrechtvrij

Vorige Volgende



[Folio 95v]
Hier is noch by gheset een schoon Refereyn vanden Aue Maria. DOen tserpent den mensch vast hadde gecnocht Onder de sonde, doen heeft hem godt besocht En heeft hem belooft een saedt der vrouwen Daer tSerpent af soude worden tonderbrocht En zijn hooft vertreden, dus is die mensche gerocht Jn Gods ghenade, die hem heeft behouwen, Aldus bleeft staende tot Abraham vol trouwen Die belooften van Godt heeft ontfanghen Dat door zijn zaedt ghebenedijdt zijn souwen Alle gheboorten, die daer nae hadden verlanghen Hier na heeft gods bermherticheyt hem omvanghen En heeft den Enghel Gabriel ghesonden Tot een maecht, daer hy toe nam zijn ganghen Die hy groete, naer deser woorden orconden Weest ghegroet vol van gratien gheuonden Die Heere is met v, ghy zijdt ghebenedijdt Onder de vrouwen bouen smenschen vermonden Maria die oodtmoedich beuonden zijdt. En doen Maria den Enghel hadde ghesien Js sy beroert gheweest van zijnen woorden met dien En dachte wat wesen mochte van deser groeten Die Enghele heeft haer den troost willen bien En vreest niet Maria wat v mach gheschien Want ghy hebt gratie geuonden niet om versoeten By Godt, want ghy sult ontfanghen moeten Jn uwen Lichame, ende ghy sult baren Eenen Sone, en sult zijnen name om boeten Heeten Jesum, desen sal wesen int vermaren
[Folio 96r]
Groot, en sal worden ghenoempt tot verclaren Den sone des alderhoochsten om vollouen Dit ist teecken dat ons in Esaias Jaren Ghegheuen was, dat een maecht onverschouen Ontfanghen soude, eenen Sone van bouen En hem baren voor alle gheloouighe wijt Dit is die Maecht die ontfanghen heeft ons prouen, Maria die oodtmoedich beuonden zijdt. End Enghel sprack God de heere sal hem gheuen Den stoel zijns vaders Dauid hooghe verheuen En hy sal wesen een Coninck inder eewicheyt Ouer dat huys Jacob, soe daer staet gheschreuen En zijn rijck sal zijn sonder eynde beseuen Dit en is niet van Dauidts gheslachte gheseydt Want hier wort dat rijck der werelt wt ghescheyt Om dat niet eewich en sal blijuen dueren En wort heel gheestelijck op Christum gheleyt Daer die Joodtsche Coninghen af zijn figueren Want den Scepter en sal van Juda tot gheender vren Ghenomen wesen, voor dat den Filio eenpaer Comen sal, dus heeft Maria om verpueren Den Engel geuraecht, hoet geschieden sal hier naer En sprack, ick en bekenne gheenen man voorwaer Dus willet my bedieden op desen tijdt Doen dengel geantwoort dees maecht eerbaer Maria die oodtmoedich beuonden zijdt. ¶ Prinche. Princersse in v sal comen den heylighen gheest Van bouen der Drievuldicheyts keest Die cracht des alder hoochsten sal v omschijnen Daeromme theylighe dat alder ghereest
[Folio 96v]
Wt v sal worden gheboren, die sal aldermeest Worden ghenoempt den sone Gods van mijnen En siet daer gaet van oudtheyt verdwijnen V nichte Elizabeth, die daer wort befaemt Onvruchtbaer, heeft ontfanghen om verfijnen Eenen sone, en dit is haer seste maent ghenaempt Want gheene dinghen dat Gods wille betaempt, En is onmoghelijck voor Gods vermeeren Maria die antwoorde reyn ongheblaemt Den Enghele, siet hier de dienstmaecht des Heeren My moet gheschien nae uwe woorden van eeren Dus is dwoort vleesch worden, en heeft ons beurijt Jn dees maecht daer wi oodtmoedicheyt aen leeren Maria die oodtmoedich beuonden zijdt. Finis.

Vorige Volgende