Rethoricale wercken

Lof van Maria.

LOf weerde Maria schoon sterre schoone
Eewich gheduerich aen tshemels throone
Ende sonder veranderen gheuende schijn
De goddelijcke sonne, de hooghe croone
Die soete drijvoudicheydt in persoone
Welcke Sonne, der sonnen hoochst moet zijn
Aen hem ontfinck dat lichten dijn
Als sterre vol gratien sonder gronden
Want de sonne des Triniteyts diuijn
Puer dalende in dijn suyuer schrijn
De Sone barende bouen conden
De sonne gheuonden, alder hoochst ghesticht
By goddelijcke crachten ghebaerst ontfaen
Lof Sterre die aen de sonne naempt licht
Wten welcken de sonne is opghestaen

Lof sterre wt Jacob hooghe verheuen

[fol. 73r]

 

Daer de Prophete af heeft gheschreuen

 

Wiens rijsen dbehoedt der menschen sy

 

Lof Sterre der Conighen nieu beseuen

 

Wiens claerheyt, wiens schoonheyt, wiens licht wtgheuen

 

Wiens nederhede, dijn comparatie sy

 

Noydt meerder nieuwicheyt, noyt meerder cry

 

Noydt sterre soe nedere, noydt sulck profijt

 

Roepen wij om troost ghy zijt ons by

 

Hopen wy volmaecktelijck talder tijdt

 

Lof eewighe sterre ghebenedijdt

 

De werelt wijt // heeft claerheydt ghesicht

 

By v exemple omme tsduechts vermaen

 

Lof Sterre die aen de Sonne naempt licht,

 

Wten welcken de sonne is op ghestaen.

 

 

 

Lof Sterre daer der sonnen schoonheit door vloeyt

 

Lof Sterre vol goddelijcker wijsheyt vroedt

 

Lof Sterre vol soeter Jubilatie

 

Lof Sterre wiens name ons weten doet

 

Licht gheuende commende in ons ghemoet

 

Des auonts in soeter visitatie

 

Voorghaende der sonne, des lichts formatie

 

Ontfanghende, ende ons daer mede beraeyende,

 

Tsghelijcx ghy Maria zijt comparatie

 

Den auondt der sonnen by v tslichts gratie

 

Afdoende, ende puer vertroosten zaeyende

 

Lof sterre voorhaeyende // puer ongheswicht

 

Om alder gratien, lof goddelijck graen

 

Lof Sterre die aen de sonne naempt licht,

 

Wten welcken de sonne is op ghestaen.

 

 

 

¶ Princersse.

 

Maria Sterre lichtende clare

[fol. 73v]

 

My duyster verblinde verlichten helpt

 

Helpt my om commen int hemelsch licht daer

 

Alle duyster donckerheydt is ghestelpt.