Rethoricale wercken

(1562)–Anthonis de Roovere– rechtenstatus



[Folio 50r]
Rethorijcke op de handt te leerene. JCk sie dese schoolkinders in Muzijcken Leeren op de handt haer noten singhen Maer ick soude gheerne laten blijcken Mijne gheminde by Rethorijcken Leeringhe op de handt, woudijs ghehinghen Want ick sie dat de handt heeft in haer bedwinghen Vijf vingheren, ende elck heeft drije leden Ende eenen naghele, die alle dinghen Den vingher doet doen met vromicheden Maer ick name de handt om wel besteden De handt des euens kerstens minne Daer my natuere heeft toe ghebeden Ende wie dmotijf doorsoeckt met vreden Hy salder vinden groote soeticheyt inne Want duecht wint croone ten hoochsten tinne. Den eersten vingher naer mijn bedieden Eert Vader ende Moeder, is hy bekent Deerste ledt heedt, hem waerdicheyt bieden Alsoe tghebodt Gods beueelt den lieden Als op staen, nijghen, sulck regiment Tweede ledt heedt, wel zijnde content Jn haer castijement, ende goet bewijs Ende tderde ledt heedt, dit in v prent Bedinstich in noode, gheef ick hem prijs De naghel voldoende dit reyn aduijs Heedt ouerdencken in tswerelts swinne Den arbeydt, den vaer, de pijne afgrijs Van vader ende moeder in tskindts iolijs
[Folio 50v]
Op help // merckt dit ten eersten beghinne Want duecht wint croone ten hoochsten thinne. Onderhoorich den Ouersten bequame Heet den tweeden vinghere, ende deerste ledt Niet staen naer hoocheyt, is zijnen name Mercken zijns Meesters eere ende fame Dats dander, dus wordtmen dienaer net Tderde ledeken heet Onbesmet Obedieren tsmeester ghebodt altijdt Alsoe Dapostel schrijft inde wet Obedieert den Ouersten waer ghy zijdt De Naghele die wercken can dit profijt Die heet: Deruen van eyghen sinne Eer ghy yemant begrijpt, eerst v seluen castijdt Derft eyghen sin, peyst ruste verblijdt Merckt douerlijden van corten ghespinne Want duecht wint croone ten hoochsten thinne. De derde vinghere sal wesen reene Hy heet tot elcken te zijne oodtmoedich Daer deerste ledt af heet alleene Hem seluen, altoos kennende cleene Min tellende, dan andere, ende onvroedich Tweede minsamich, tderde hoedich Ende zijnen nedersten goederhande zijn Met dese drije leden wijs ghespoedich Sal den vingher in goeden ghestande zijn De naghele die suyuere doet van schande zijn Js dat elck zijn selfs cranckeyt bekinne Ende claerlijck die in desen verbande zijn Sy sullen Gode een offerande zijn
[Folio 51r]
Bouen Cherubin ende Cheraphinne Want duecht wint croone ten hoochsten thinne. Vriendelijck in gheselschepe te zijne Heet den vierden vingher int bespien Huessche wandelinghe tallen termijne Eerbaer van woorden in blijden schijne Ende alle dinck met goeden ooghen aensien Dit zijn de drie leden daer tsvinghers ingien By roerdt ende wacker wordt inder vruecht De naghel die dit al doet gheschien Die heet by namen: Constich ter duecht Zenuwen, aderen, puls, die wordt verhuecht Als de handt pijnt te desen ghewinne Dbloet wter iuncturen ghecrijghes iuecht Dus leerdt dese handt of ghy muecht Hope die wordter uwen trooster inne Want duecht wint croone ten hoochsten thinne. Mint uwen vyandt, want Godt cant raden Dats den vijfsten vingher, hy sal croonen dy Deerste ledt: heet vergheten alle misdaden Dander, minnelijck groeten in ghenaden Tderde, quaet met duechden loonen vry De naghele die brengt dit verschoonen by Leert kennen hoe dat wy Godt verwercken Die doorschouwer van allen persoonen sy Ende dicwils vindt met sondighe wercken Voorwaer wilden wy dese handt wel mercken Kinderen sanck souden wy achten dinne Godt wil ons allen in duechden soe stercken Dat wy zijnder Enghelen vlercken
[Folio 51v]
Beluycken, ende vlien des quaetheyts vinne Want duecht wint croone ten hoochsten thinne. Mijn vrienden, Muzijcke en vermaede // ick niet Tis een edele conste, gheuonden op de handt Nochtans dese handt te leerene raed ick // siet By Rethorijcke voor tsekerste pandt Mijn teer beuoelen hem dit bewant Waert beter ick wouds, doch nemet int goede Voor Christus der saligher sielen landt Nv ende eewelijck in vleesche in bloede Die wil ons al nemen in sijnder hoede.

Vorige Volgende

Rethorijcke op de handt te leerene.