Rethoricale wercken
(1562)–Anthonis de Roovere–
Auteursrechtvrij
[Folio 22v]
| |
HOordt nae my ghy spitters ghy deluers
Die daghelijcx moet int werck labueren
Al en gaerdy de kiste niet vol seluers
Wilt dies niet bouen redene trueren
Tis salich int sweedt v broodt besueren
Wilt onghenochte van v iaghen
Maect goede moedt, v sal ghebueren
Pap ende broodt in doude daghen
Ghy ambachtslieden die groote pijne // doet
Als menich wtghenomen // man
Wanneer elck niet recht in tzijne wroet
Soe en volchter gheen verdomen // an
Jn weldoen wilt veruromen // dan
Peyst Gods loon salt al ouerdraghen
Wiens gratie elcken an dromen // can
Pap ende broodt in doude daghen.
Ghy climmers die kercken ende thorrens // maeckt
Om cleynen loon die vreese aensien
Wanneer v wanhaghelijck porren // naeckt
Laet Godt v loon zijn als van dyen
Eedt, drinckt, wilt vry om dbeste spien
Dlijf moet gheuoedt zijn, dat is gheen vraghen
Al en gaerdy gheen schadt, v sal gheschien
Pap ende broodt in doude daghen.
Hoordt ghy pelgrimagie loopers
Voyagiers, Rijders, om haue om gheldt
Al en zijdy gheen groote rente coopers
Ghetrouwen aerbeydt is hooghe ghetelt
Som zijdy teenen Monioye ghestelt
| |
[Folio 23r]
| |
Maer sterfdy thuys tis groot behaghen
Ghy crijcht al en haddy broodt noch ghelt
Pap en broodt in doude daghen.
Hoordt ghy sleypers ende ghy draghers
Die daghelijcx groot last heffen ende voeren
Weest vanden aerbeyde gheen beclaghers
Wat gady veel nae rijckdom loeren
Schost / brost / ende wilt de kanne roeren
Maeckt goede chiere met vrienden met maghen
V sal ghebueren, schoudt valsche toeren
Pap ende broodt in doude daghen.
Ghy aerbeyders die ick heete goedt rondt
Alexander is doodt met al den rijcken
Dit heb ick touwer eeren vermondt
Om v te troostene by ghelijcken
Schouwet ende vreest altoos practijcken
Al en hebdy gheen suyghebeen om cnaghen
Werckt vry, den ledighen sal beswijcken
Pap ende broodt in doude daghen.
Ende hier mede troost ick my seluen voort
Gode bidick om pap ende broodt
De moghende heeft dickwils mijn name gehoordt
Dat my dies cleyn secours beschoodt
Met wercken weer ick des honghers noodt
Gode danck ick, can ick sonder claghen
Noch bid ick soe ick eerst besloodt
Om pap ende broodt in doude daghen.
|
|