Fred

[p. 1]

Fred

Fred ben de a tweede boi foe en mama. A ben tapoe siksi jari kba. En bigi brada ben nen Emil. Wan dei di a ben waka na strati, a ben si wan swarfoedosoe. A skopoe en wantoe meter moro fara. A waka moro fara èn a skopoe a dosoe baka. Dan a jere wan sten taki: ‘Teki a dosoe.’ A teki a dosoe èn a loekoe na ini. Dri dala ben de na ini. Fred no ben sabi omeni moni ben de ini a dosoe. So a waka langalanga go na oso.

[p. 2]

Fred omoe ben taki tori nanga en mama na mofodoro. Di Fred doro na oso a taki omoe nanga en mama odi. Dan mama go teki kowroe watra gi omoe na inisei. Di omoe si taki Fred ben ori wan sani na ini en anoe, a taki: ‘Boi, san joe abi na ini joe anoe?’

Fred piki: ‘We, mi feni wan dos'swarfoe tapoe strati.’

Omoe taki: ‘Kon meki mi si.’

Fred gi omoe a dosoe. Di omoe si den dri dala a taki: ‘Boi, joe no moes taigi no wan sma.’ Dan a bari gi mama: ‘Wakti, mi e kon djonsno.’

Omoe go langalanga na wenkri, dan a broko wan goloe ini wan hondro koprosensi. Dan a poti en ini wan saka. Di a drai kon baka na oso, a kari Fred kon dan a gi en a saka. Omoe taki: ‘A kon moro foeroe, tog?’

Fred ben breiti. A piki: ‘Ja, omoe.’ Dan a lon go na wenkri. Ala leisi a ben go bai wan sensi soekroesani na omoe sneisi.

A tra dei di a go na skoro a bai foeroe switi-sani, bika fosten ala sani ben boenkopoe. Fred bigi brada no ben sabi noti. Di a kon na oso, en omoe ben sidon na mofodoro baka. A taki odi èn a psa go na inisei. Mama ben poti njanjan gi den boi klar' klari tapoe a tafra. Di

[p. 3]

mama si dati Fred no teki en njanjan, mama taki: ‘Fred, san doe joe? Her' dei mi e si fa joe e njan lektongo. Pe joe feni moni foe bai lektongo dan?’

Fred ben poti en finga ini en mofo dan a loekoe en omoe. Mama taki: ‘Poeroe joe finga foe joe mofo. Joe no e jere dati mi e taki nanga joe? Pe joe feni moni?’

Omoe ben sari Fred. Dan a taki: ‘We, esde a feni dri dala ini wan swarfoedosoe. So mi teki a moni dan mi broko wan goloe ini hondro koprosensi gi en.’

[p. 4]

Mama taki: ‘Baja, dan gi mi wan pikin sani foe joe toe.’ Omoe gi mama dri goloe. Dan mama taki: ‘Ai, baja! Mi no ben abi no wan koprosensi moro. Dan tamara mi o bori wan switi pindasoepoe.’