Gheestelycke plantaige van gheestelijcke op-climmende boomen

[p. 184]

Nieuw Mey liedeken: Op de Wijse.

Hoch hoe zijt ghy aldus verdooft.

1.

Comt aen vriendin, comt aen ghetre'en
Den alderschoonsten Mey ist hier te ge'en:
Wy hebben hem voor u ontfaen
T'is eenen Mey daer Christus heeft gehangen aen.

2.

Wat Mensch die hier in droefheyt leeft,

Die desen Mey oprechtelick aencleeft
Van synen druck, en t'sherten gal
Wort hy seer lichtelick bevrijt in't aertsche dal.

3.

Hoe ymant t'Cruyce meer bemint

Hoe hy Godts liefd' in hem oock meer bevint:

[p. 185]

 

En wie oock t'Cruys in't herte plant

 

Hoe dat eens menschens hope wast meer abundant.

 

4.

 

Men heeft dit soo niet te bedien,

 

Men siet het daghelickx ghenoech gheschien

 

Godt is by hem, in't midden in,

 

Die tot het Cruyce Christi droeght een pure min.

 

5.

 

Dat desen Mey soo crachtigh is

 

En moet u gheven gheen verwondernis,

 

Met Christus bloedt is hy besproeyt

 

Daerom ist dat op hem den nest der deugden groeyt.

 

6.

 

Lof maeckt dat t'Cruyce t'allen ty

 

In't diepste van u herte ghegreffet sy,

 

Het sal u hert aendoen een deught

 

Waer me ghy maeken sult, van druck een waere vreught.