Gheestelycke plantaige van gheestelijcke op-climmende boomen

[p. 174]

[O Herderin hier over ons ghestelt]

Op de wijse.
Cher cupidon vn son tout vous discours.

1.

O Herderin hier over ons ghestelt,
Compt voor den dagh by ons al in het velt,
We hebben eenen Mey als nu bereyt,
Tot uwen dienst, met al ootmoedigheyt.

2.

Dien Mey naer dat wy hem hebben ghesocht,

Wy hebben hem ontfaen, en in ghebrocht,
Wy hebben hem ghestelt al in dit perck,
Om daer op wel te nemen ooghe-merck.

[p. 175]

 

3.

 

Door desen Mey zijn wy worden verheught,

 

Compt siet, op dat ghy oock dit proeven meught,

 

T'is eenen Mey verciert met alle groen,

 

Waer aen gehanghen heeft des Mensch ransoen.

 

4.

 

Als desen Mey-boom eerstmael was gheplant,

 

Wast datmen eerst den wegh des hemels vant,

 

Want Christus heeft hem voor ons ghebaent

 

Als hy hier wandelde in smensch ghedaent.

 

5.

 

Jae desen Mey die costelicke staeck,

 

Die heeft hy ons ghelaeten voor een baeck'

 

Om als daer ymant dolt door druck of rouw,

 

Dat hy daer op syn ooghen stieten sou.

[p. 176]

 

6.

 

T'is veel voor die hier op dees werelt leeft

 

Dat hy tot seker sulck een baeken heeft;

 

So datmen desen Mey al in't publijck,

 

In eere moeten houden al ghelijck.

 

7.

 

Lof Herderin hier me zijt ghy begroet,

 

Aenveert den Mey en eert hem soo ghy moet,

 

Op dat ghy door t'bewysen van dees eer,

 

Voor eeuwigh meught ghenieten Godt den heer.

FINIS