Gheestelycke plantaige van gheestelijcke op-climmende boomen

[p. 150]

De begheerighe presenteert een Gheestelijck Mey-liedeken aen haer Vriendinne.

Op de wyse: courante lorraine, of mijn beminde Clorinde.

1.

Liefsten vriendinne, uyt minne
Met blyden zinne, nu ter tijt,
Bringhen wy hier daer ghy syt,
Den schoonen Mey ghebenedijdt:
Eenen Mey seer soet
Waer aen t'eeuwich goet,
Heeft ghestort syn bloet.

[p. 151]

 

2.

 

Wilt hem aenschouwen, en houwen,

 

Ter goeder trouwen, soo ghy meucht,

 

Hy sal maecken u verheught

 

Dat ghy in pijn sult maecken vreucht

 

Want hy doet voorwaer

 

In druck en beswaer,

 

Wercken wonderbaer.

 

3.

 

Hy houdt in sneven, en beven

 

Den moet verheven, t'allen stondt:

 

Van hem wort ons oock ghejont

 

Dat hy de ziele maeckt ghesont:

 

Sijnde een Medecijn

 

Al op dit termijn

 

Voor die syn in pijn.

[p. 152]

 

4.

 

Wilt u verblijden, u strijden,

 

En al u lyden, dat u raeckt

 

Sal van u niet syn ghesmaeckt,

 

Ist dat ghy werck van t'Cruyce maeckt

 

Syt ghy in dit wout

 

Yvers in benaut

 

Desen Mey aenschaut.

 

5.

 

Ghy sult door desen, ghenesen,

 

Daer by oock wesen, seer ghestilt,

 

Ghy sult willen dat Godt wilt

 

Al ist dat hy u pijnt of vilt,

 

Met een bly ghelaet

 

Of ghy metter daet

 

Heel in voorspoet saet.

[p. 153]

 

6.

 

T'cruyce doet vluchten, ons duchten

 

Jae al ons suchten, en verdriet,

 

T'doet het comen al op niet,

 

Alsmen ten rechten tot hem vliedt,

 

En t'maeckt ons bereyt

 

Door Godts mildicheyt

 

Tot de salicheyt.

 

7.

 

Orlof met zeden, wilt heden

 

den Mey besteden, in u hert,

 

Hy sal werren al u smert;

 

Al is sy groot seer swaer en erdt,

 

En ghy sult hier me

 

Gaend' uyt s'werelts ste

 

Cryghen d'hemels ure.