Gheestelycke plantaige van gheestelijcke op-climmende boomen

[p. 128]

Sy vraeght waerom dat hy soo langhe beydt van syn ghesicht, aen haer te toonen.

Stemme.
Cupido hoe doet ghy my &c.

1.

Soeten Jesus eeuwich licht
Door wien de schepsels al syn ghesticht:
Compt toont my u ghesicht
Op dat mijn hert mach syn verlicht;
Ghy hebt my sulcx toe gheseyt
Maer uwe groote Majesteyt
Die blijft altijdt van my ghescheyt
D'welck voor mijn hert is groote bitterheyt.

[p. 129]

 

2.

 

Van uwe worden ick veel hauw'

 

Nochtans by naer ick dincken sou,

 

Dat ghy syt onghetrouw

 

Laetende my in desen rouw:

 

Ick soeck u al om een paer

 

En ick en word' u niet ghewaer,

 

D'welck voor my is een cruyce swaer,

 

Want elcken dach dunckt my te syn een Jaer.

 

3.

 

Veele maenden syn voor by,

 

En oock veel Jaeren ghestelt aen sy,

 

En ghy seght t'allen ty

 

Dat ghy sult commen haest by my;

 

Hier me wel mijn hope groeyt,

 

Maer om dat ghy u niet en spoeyt

[p. 130]

 

My dunckt dat ghy my heel verfoeyt

 

En oock het langhe beyden my vernoeyt.

 

4.

 

Want ick meynde over lanck

 

Eens te ghenieten met uwen danck,

 

U schoon ghesichts ontfanck

 

Om te versaen mijn hertjen cranck:

 

En ick sie g'en compt niet voort

 

G'en syt ghebonden, noch ghecoordt,

 

T'en is sy leven niet ghehoort

 

Ghy moet op my wel syn ghestoort.

 

5.

 

ick moet t'hooren t'allen tyt

 

Mijn sinnen alle, doen my groot spyt,

 

Sy segghen met verwyt:

 

Dat ick u teenemael ben quyt;

[p. 131]

 

Hierom compt o Heer compt aen

 

Wilt my met u ghesicht by staen,

 

En wilt my van t'verwijt ontslaen

 

Laet nu mijn herteken eens troost ontfaen.

 

6.

 

Binnen dien ick u verbey

 

Vertoont ghy my hier in dees contrey

 

Schoon schepsels alder-ley

 

Maer neen k'en zie naer sulck geen wey:

 

Ick zie naer een beter stick

 

De schepsels syn verganckelick

 

En ghy die syt onsterffelick

 

Soo dat ick u bemin alleenelick.

 

7.

 

Orlof Godt schoon van aenschijn

 

Compt en vertroost my op dit termijn

[p. 132]

 

In dese mijne pijn,

 

Eer dat ick hier gheheel verdwijn:

 

K'ben nu langh' ghenoech beproeft

 

En ghy hebt lang' ghenoegh vertoeft,

 

Neemt weg van my, dat my bedroeft

 

Schinckt my u schoon ghesicht dat my behoeft.