Cort verhael van tPrincipael, in Leyden bedreven, by Sotten meest, die op Vrou Lors Feest waren verschreven


Sots Liedeken, van tSottgen van Vlaerdingen: Op de wijs, Salmen dus de rooskens plucken. GHy Sotkens al// tcomt wel te passen Hout al aen wilt hincken naer Wy moeten tmal// Swijn aldus wassen Dat de Borstelen blincken claer Ioncker Mors wel lieve geselle Den bulleman die moet inde Hellen Vrou Lorts maechdom weecht te swaer Hoort alle gaer. Strontgen is by// zijn broer ghecomen Dat heeft malle lieft gedaen Ioncker Mors bly// die heeft genomen Onse Vrou Lorts, hoe salter gaen
[Folio B3v]
Tot lorssen en morssen wy ons wennen Dat Sotkens haer selfs niet en kennen Acht niet hoet int ent sal staen Daer leyt niet aen. Vry domineert// ghy Sotte bloeden Leert financy aen ons Bruyt En vry verteert// eens anders goeden Treet daer na te Lande wt Mal zijn sy die ons gelooven Eer zijt Sotken recht beproven Die zijn van alsulck vertuyt Leck is de schuyt. Nu moet de Vruyt na hare willen Ras te bedde wilt u spoen Met Ioncker Mors, zijn dat niet grillen Wat salmer nu al Sotkens broen Den eenen stinct vol vuyle leuren Dander ist hemd geknocht vol scheuren Tschijnt van buyten noch fraey faetsoen Maer tvolck vermoen. Marothe seyt van nieuwe cleeren Te halen op de Kerfstock Die stoute meyt// sy eet so geeren Dagelijcx een lecker gebrock Niet te doen en lange te slapen Men vint wel veel alsulcke knapen Prince of ick haer gaef de Kock Iock jock jock jock.