Cort verhael van tPrincipael, in Leyden bedreven, by Sotten meest, die op Vrou Lors Feest waren verschreven


Dansliedeken, ghesonghen by tSottgen vander Goude. Wilt al ter Feeste comen Ghy Sotten en Sottinnen Hier vry al sonder schromen Van buyten en van binnen Na Ioncker Mors comt rinnen Die zijt van zijn Gheslacht Bescheten tot u kinnen, Hy heeft na u gewacht.
[Folio B2v]
Vrou Lors die doet ontbieden Hare gesusters alle Wilt haer plaetse bespieden Tsy Griet, Lijs, ofte Calle, Vrou dantelory smalle En slapschijt hier ter stee, Comt ghy claddonijs malle En hout aen onse stee. Ghy dronckaerts die vol suypen En zijt hier niet vergeten Al in u pack gaet luypen Als den brouck is bescheten Slock in comt vry mee eten Coppen met u Clapspaen Die met tspit is gesmeten Coomt vry sonder beraen. Prince. Princen met groote hoopen Clappeyen al te malen Coomt vry drinct volle stopen Ghy sult hier niet betalen, Noch tgelt en sult ghy halen Al inde Lombaert niet Coomt ghy aerdige alen Ons Feeste wel doorsiet. Wt ionsten begrepen.