De cleyn vverelt

[fol. 67r]

[Demosthenes heeft den volcke van Athenen verclaert]

Demosthenes heeft den volcke van Athenen verclaert,
Van die boose vvolven en haren valschen aert.

Sapien. 6.

VVetenschap is beter dan cracht der leden,
En die vvijse is beter dan die stercke t'elcker steden.

[fol. 67v]

 

Als Philippus die vvyse van Athenen had begheirt,

 

Heeft Demosthenes totten volcke ghesproken dese reden:

 

Op een tyt hebben haer die schapen, en die honden gevveirt

 

Voor die boose VVoluen, die teghen haer streden,

 

Ten laetsten souden die vvoluen, syn te vreden,

 

VVouden rechts die schapen die honden verlaten:

 

Dit behaechde den schapen, dies sy t'selue soo deden.

 

Maer die vvoluen (siende dat sy nu bloot saten)

 

Hebben d'arme schapen vernielt bouen maten.

 

Hier mede bevvees hy den volcke playsant,

 

Dat haer stercke mueren haer niet en souden baten,

 

VVaert dat sy die vvyse verlieten, vvant

 

Een groote ruyterschap, oft een ghevvapende hant,

 

En can niet bedryuen sonder vvysen raet.

 

VVysen raet heeft Athenen soo bevryt aen elcken cant,

 

Dat sy niet en vreesden Philippus oorlochse daet.