Het boeck der psalmen Davids

De Cj. Psalm.

Dauid zijnde Coninck ghemaeckt, belooft God dat hy dat ampt eens godsaligen ouerheyts doen sal: t'welcke is oprechtelijck leuen, die boose scherpelijck straffen, ende die vrome eeren ende verheffen.

1. Een Psalmliedt Dauids.

ICk ben van sins te stellen schoon by dichte,
Een heylig liedt van goetheyt end' gherichte:
Dan wil ick Heer mijn Psalmlied bieden dy

Van herten bly.

2. * Den rechten wech met wijsheyt wil ick trachten,
End' met ghedult nae dyne conste wachten,
End' mid'lertijt my houden binnens huys

Met herten kuysch.

3. * Gheen boose saeck sal my voor oogen comen,

[fol. Rvjv]

 

Want ick doch haet' de wercken der onvromen:

 

Gheen van hun al sal sick met boevery

 

Voeghen by my.

 

4. * Die int gemoet zijn schalck end' vol otrouwe,

 

Wijcken van my end' sullen mijn hof schouwen:

 

Want ick doch niet ghemeynschap houden kan

 

Met een valsch man.

 

5. * Die achter rugg' quaet van haer naesten spreken,

 

Wil ick voorwaer met onghenaey versteken:

 

Wie trotzich is, end' opgheblasen siet,

 

Dien lyd' ick niet.

 

6. * Ick wil met gunst sien aen end' hoog vereeren,

 

Die ongheveynst in goeder trouw' verkeeren.

 

De vrome lie'n sullen my blyuen by

 

End' dienen vry.

 

7. * Maer wie met list end' valscheyt haer geneiren

 

Sal ick met toor'n uyt mynen huyse weiren:

 

Want gheen van dien die om met leughen gaen

 

Sal voor my staen.

 

8. * Ic wil goets tijdts al die haer god'loos dragen

 

Wt Godes stadt end' uyt den lande jaghen,

 

Op dat God's huys ontledicht ende vry

 

Van boosheyt zy.