Het boeck der psalmen Davids

[fol. Riijv]

De Xcviij. Psalm.

Dese Psalm vermaendt alle schepselen om Godt te louen, ende Christum met vreugde te onthalen, ouermits de victorie ouer syne vyanden. Ende de verlossinghe syner ghemeynte.

Een Psalmliedt.

1. SIngt God den Heere nieuw' lofsangen,
Die wonderwercken heeft gewrocht:
End' heeft met macht ons doen ontfangen,
Den heyl die zijn erm heeft ghebrocht.
2. God heeft zijn hulp aen't licht ghegheuen,
Daer mede wy verlosset zijn:
End' sijn gherecht'heyt claer verheuen
Voor alle volcken ten verschijn.

[fol. Riiijr]

 

3. * T'heeft hem ghelieft te zijn indachtich

 

Van zijn ghenaed' end' goetheyt milt,

 

End' syner trouw' end' woort warachtich:

 

Die hy Israel pleghen wilt.

 

Des werelts eynden wijt ghestrecket

 

Sien synen heyl end' groote deught:

 

4. Daeromm' moet d'eertrijck zijn verwecket,

 

Tot rechte blyschap ende vreught.

 

5. * Men juyche vrolijck ende singhe,

 

Met harpen end' met stemmen sanck:

 

Men dryue vreught, men rey' end' springhe:

 

6. Men hoore des basuyns gheclanck.

 

Juycht, end' singt Psalmen voor den Heere

 

Die sick een machtich Coninck thoont:

 

7. T'meyr end' haer inhoudt dond're seere,

 

Met d'eertrijck end' wat daer op woont.

 

8. * Laet't vloeden ende stercke stroomen

 

Van vreugden clapp'ren inde hant:

 

Laet't hooghe berghen met haer boomen,

 

Bedryuen blyschap allerhandt.

 

9. Want God comt richten end' bestieren,

 

De gantze weirelt, ende sal

 

In zijn gherecht'heyt goedertieren,

 

End' billicheyt verrichten al.