Het boeck der psalmen Davids

De Lxxxvij. Psalm.

In desen Psalm vvort Godt ghepresen, van vveghen syner teghenvvoordicheyt, ende menichfuldigher vveldaden die hy syner gemeynte bevvijst, mitsgaders oock van vveghen der beroepinghe der Heydenen.

1. Den kinderen Korach. Een Psalmliedt ende ghesanck.

GOdt heeft een gront vercoren hier beneden
Voor syne stadt tusschen t ghebergte hoogh':
2. End' heeft Sion met een seer minlijck oogh'
Lieuer ghehadt dan alle Jacobs steden.

[fol. Pvjr]

 

3. * O du stadt Godts wat schoon' heerlijcker dinghen,

 

Spreeckt men van dy! 4. Als dat Egypten sal,

 

Met Babylon haer namen, in't ghetal

 

Van Godes volck, ootmoedich laten bringhen.

 

* Philisters oock end' Tyriers end' Chusiten

 

Segghen met roem: Siet des' is oock van daer.

 

5. Een yegh'lijck sal bly sijn dat hy mach daer

 

Sions gheboort' end' borgersrecht ghenieten.

 

* Want d'allerhoogst' heeft Sion uytvercoren,

 

End' opgebouw't. 6. Als hy dan teeckent aen

 

Der volcken naem, sal elck een willen staen,

 

Onder de ghen' die aldaer zijn gheboren.

 

7. * Daer salmen vry met heller stemmen singhen

 

End' met gheclanck der snaren zijn verheugt.

 

De gantsche gront van alle myne vreugt,

 

Sal uyt Sion als uyt haer ader springhen.