Het boeck der psalmen Davids

De Lxxix. Psalm.

De Prophete beklaegt de svvare verdruckinghe ende ellende die het volck Godts van Antiocho gheleden heeft, vvenscht den god'loosen de rechtveerdighe straffe Godts toe: bidt Godt voor de ghemeynte om

[fol. Oiijv]

verghevinghe der sonden, ende verlossinghe tot sijn Naems eyghene eere, der god'loosen beschaemtheyt ende der godtsalighen voordeel.

1. Een Psalm voor Asaph.

DE Heydens Heer sijn in dijn erf getreden,
Daer hebben sy die heylighe woonsteden
Dijns tempels reyn, seer schendelijck onteeret,
Jerusalem tot hoopen steens ghekeeret.
2. End' de lichamen nackt,
Van dijn knechts voorghesmackt,
Den rauen ende ghieren,
Den beesten op het velt,
Tot haer aes voor gestelt,
T'vleesch dyner goedertieren.

[fol. Oiiijr]

 

3. * Ghelijckmen ghiet het water op der straten,

 

Hebbens' haer bloet ghestort end' loopen laten

 

Gheheel rontom Jerusalem der stede,

 

End' daer was gheen dies' oyt ten graef bestede.

 

4. Wy sijn o Heere Godt,

 

Gheworden tot een spot,

 

All' onsen naghebueren.

 

Eens yegh'lijcks schimp end' smaet

 

In huys end' op de straet,

 

Sijn wy tot allen uren.

 

5. * Och God hoe langh' sal dit noch also blyuen?

 

Wilstu altijts dy stooren ende kyuen?

 

Sal dyne tor'n end' yuer dyner wraken,

 

Ghelijck een vlamm' dus eewich op ons blaken.

 

6. Laet lieuer desen brandt,

 

Gaen ouer t'volck end' t'landt,

 

Die dynen naem niet achten,

 

Wil Coninckrijcken slaen,

 

Die dy noyt riepen aen,

 

O Godt Heer der heyrcrachten.

 

7. Want sy zijn Heer die stout end' seer vermeten

 

Jacob gheheel schier hebben opghegheten,

 

Haer woonplaets' ooc van dijn genad' verworuen,

 

Hebben verwoest, end' uyt den gront verdoruen.

 

8. Ghedencke doch niet meer,

 

Op ons' misdaden Heer,

 

Eertijts van ons bedreuen:

 

Haest, dat ons int ghemoet

 

Comm' dijn ghenade soet,

 

Want wy seer benouwt leuen.

 

(1) ** **

 

9. * Help' ons o God ons' hulper ende Heere,

 

Om dynes naems grootmakingh', lof end' eere

 

Verloss' end' wil ons' sonden ons vergheuen,

 

Op dat dijn naem hoogh' werd' alomm' verheuen.

[fol. Oiiijv]

 

10. Waerom soud' t'volck uyt spot,

 

Segghen waer is haer Godt?

 

Wil lieuer Heer dijn wraken,

 

Ouer t'vergoten bloet,

 

Van dyne dienaers vroet,

 

Alomme ruchtbaer maken.

 

11. * Laet het gheschrey end' t'suchten der gevangen

 

Tot dynen throon aen dyner oor ghelanghen:

 

Nae dyne macht wil doch in leuen houden,

 

Die totter doot verwesen werden souden.

 

12. End' ons ghebueren stout,

 

Wil seuen dobbelfout,

 

In haren schoot verghelden,

 

Den schimp spot ende hoen,

 

Die sy dy, Heer' aendoen,

 

Als sy dyn' naeme schelden.

 

13. * Soo sullen wy dijn volck end' dyne knapen,

 

Die dyner weyd' o Heer zijn rechte schapen,

 

Dijn grooten naem hoogh' prysen t'allen stonden

 

End' dynen loff van kindt tot kindt verconden.