Het boeck der psalmen Davids

De Lij. Psalm.

Dauid straft den hoomoet van Doëg, de welcke hem daer inne roemde dat hy des Heeren priesters verraden hadde, I. Sam. 22. Hy verhaelt Gods gerichten, biedt de ghemeynte gheluck, ende sterckt sick in het vertrouvven, dat hy Gode noch dienen sal in syner ghemeynte.

1. Den oppersangmeester, Een berichtsliedt Dauids.

2. Als Doeg van Edom tot Saul gaende, hem de wete ghedaen hadde ende ghesegt dat Dauid ghegaen was int huys van Achimelech.

3. DU mensch die du bist sterck end' machtich,

[fol. Iiiijv]

 

Waerom beroemstu dy?

 

In dyne boose schalcheyt crachtich

 

Die du bruyck'st teghen my:

 

Daer Gods ghenad' ghebenedijdt

 

Doch duert tot eew'ghen tijdt.

 

4. * Dijn tongh' is vol van schalcke rancken

 

End' snijdt als een scherp vliem:

 

Sy vollenbrengt dijn quaey ghedancken,

 

End' slacht eens moorders priem.

 

5. Het boos' beminstu meer dan t'recht:

 

Leughens dan waerheyt slecht.

 

6. * Tot alle lasterlijcke reden

 

Is dijn hert' wel ghemoed't.

 

7. God sal dy t'eenemael ontleden

 

Du valsche tongh' onvroet.

 

Du salt noch werden uytgheruck't

 

End' uyt dijn plaets' ghedruck't.

 

Dyn' wortel sal de Heer uyt trecken

 

Wt t'leuendighe landt.

 

8. T'godsalich volck salt sien, ende schrecken

 

Voor s'heeren stercke handt.

 

End' vrolijck lacchen all' te gaer

 

Dus sprekend' onder haer:

[fol. Ivr]

 

9. Dat is de man die t'syner baten

 

Den Heer' niet hebben wou:

 

Maer heeft sick op zijn goet verlaten

 

End' op zijn gelt ontrouw.

 

End' hem ghesterckt met schalckheyt boos

 

Als een recht goddeloos.

 

Maer ick als een boom van olyuen

 

Die lustich staet en groeyt

 

Sal in Gods huys met spoet beklyuen:

 

Om dat ick onvermoeyt,

 

Op Gods ghenaden menichfout

 

Oyt end' oyt heb vertrouwt.

 

11. * Ick sal dy prysen Heer ghestadich:

 

Want du hebst dit ghedaen.

 

Op dynen naem end' hulp ghenadich

 

Sal mijn hop' blyuen staen:

 

Want du bist goet end' heylsaem seer

 

Dyn'n goedertier'nen Heer.