Den Lusthof der gheestelicke oeffeninghen

[p. 117]

Des Nachts.

Wat sullen vvy doen by nachte als wy vvacker vvorden?

WY sullen ons, als in de teghenwoordicheydt Godts, ende sijnder Heylighen eerlick draghen: alle ongheschickte ghepeysen verdrijuen, ende ons herte met Godt vereenighende, op dese maniere bidden.

Ghebeden voor den Nacht.

WY bidden v, o Heere, besoeckt dese wooninghe, ende verdrijft verre van haer alle listen ende laghen des vijandts: uwe Heylighe Enghelen moeten daer in woonen, die ons in vrede bewaren, ende uwe benedictie zy altijdts ouer ons. Door Christum onsen Heere. Amen.

Ontfanght, o alderheylighste Drijvuldicheydt, alle mijne asemen in dese nachtruste, als lof-sanghen van uwe godtlicke Maiesteyt.

O Heere Iesu, wilt my bewaren, ende als het lichaem slaept, mijn siele in v wacker maken: op dat sy dat alder-salichste leuen altijdt voor ooghen hebbe.

[p. 118]

Laet, o Iesu, den alder-soetsten Gheest uwes herten invloeyen in mijn siele, ende wederom mijn herte gheheel in hem trecken, ende onverscheydelick met hem vereenighen.

O soete Iesu, rust in mijn siele, ende versterckt haer in uwe liefde.

Zijt, o Heere, ghebenedijdt in desen mijnen slaep.

Godt gheue ons eenen gherustighen nacht, ende een salich eynde.

Alle Godts lieue Heylighen, wilt my omringhen, ende bewaren.

O ghebenedijde Moeder Godts, blijft by my, met v hemelsch gheselschap.