Den Lusthof der gheestelicke oeffeninghen

[p. 1]

De eerste Oeffeninghe om 's morghens den dach godtvruchtelick te beghinnen.

VVat sullen vvy doen 's morghens als wy wacker vvorden.

WY sullen ons laten voorstaen, dat Godt almachtich, die in't Euangelie eenen ackerman genoemt wordt, ons oproept, om in sijnen wijngaert te gaen wercken, ende tot ons seght: VVat lichdy hier soo langh ledich, als andere een groot deel des nachts in my te louen ghearbeydt hebben? Ende bekennende het noodelick verbondt

[p. 2]

dat wy hebben, om Godt te dienen; sullen ons teeckenen met het teecken des H. Cruys, teghen alle quaede ghedachten, die ons den duyvel lichtelick dan aenbrenght, ende Godt op deser maniere antwoorden.

In den naem des Vaders, ende des Soons, ende des Heylighen Gheests. Amen.

Ghebedt als vvy vvacker vvorden.

ICk volghe v, o mijnen Godt, ende opene v mijn ooghen, ende het binnenste mijnder herte: zijt met alle uwe Heylighen inder eewicheydt ghebenedijt door de weldaden uwe besoeckinghe ende bewaernisse.

Ghebedt als vvy op-staen.

IN den naem mijns Salichmakers Iesv Christi,, die my met sijn dierbaer bloedt verlost heeft, sta ik op: Sijn benedictie wapene my teghen alle sonden, verstercke my in alle deughden, ende brenghe my tot de eewighe salicheydt. Amen.

1. Ghebedt als vvy ons kleeden.

WIlt, o Iesv, mijn naeckte siele kleeden met ootmoedicheydt, deuotie, ghehoorsaemheydt, patientie, ende uwe Heylighe liefde.

[p. 3]

II. Ghebedt als vvy ons kleeden.

ICk offere v mijnen Godt, het beginsel van desen dach, ende alle de wijlen van mijn leven: wilt my heden bewaren, regeren, ende met uwen Heylighen Gheest verlichten: op dat ick altijt mach weten, begheeren, ende doen dat uwen alderheylichsten wille behalick is.

Onderwiisinghe voor het morghen-ghebedt.

WY sullen, alsoo haest als wy van het bedde ghetreden zijn, ons besproeyen met wij-water, ende segghen:

Den Heere Jesus wil my van leedt bewaeren, ende met sijn gratie tot het eewich leuen voorderen. Amen.

Daer nae sullen wy aen-doen ons Agnus Dei, (is't dat wy 's auonts te vooren dat afghedaen, ende binnen onse koutse, tot onser bewaernisse ghehanghen hadden, ende dat cussende segghen:

Wilt my, o Heere, deelachtich maken, alle benedictien, die uwen Stadt-houder ouer dit heylichdom ghesproken heeft.

Eyndelick, als wy nu behoorlick gekleedt zijn, wy sullen, eer dat wy ons tot eenige tijtlicke bekommernisse begeuen, op onse knien, in eenighe bequame plaetse, ons morgen gebedt, met behoorlicke deuotie doen, ende in

[p. 4]

het selue dese vijf dinghen onderhouden.

Ten eersten, Godt dancken van alle de weldaden, die wy oyt van hem ontfanghen hebben; ende namelick dat hy ons tot dien dach toe om ons leuen te beteren, ghespaert heeft.

Ten tvveeden, Ons bedroeuen, dat wy den voorleden tijdt, niet beter tot Gods eere ouer ghebrocht hebben: Ende Godt bidden, ons dat bermhertelick te willen vergheuen.

Ten derden, Godt ons gheheel opofferen, ende een voor-nemen maken van hem dien dach neerstelicker, dan wy ghedaen hebben, te dienen, ende gheene sonde te doen.

Ten vierden, Godts hulpe daer toe versoecken, ende bidden, dat hy ons soude willen van alle sonden, ende ander ongheluck bewaren.

Ten vijfden, Met andere ghebeden, soo wel ons seluen, als alle andere dinghen, daer wy voor begheeren te bidden, Godt ende sijne Heylighen beuelen: ende door de ghestadicheyt in 't gebedt ons meer en meer in Godts liefde, ende oprechte deuotie ontsteken: ende ons met de salighe bewaernisse van Godts lieue Heylighen, teghen alle perijckelen onser sielen voor dien dach bevrijden.