Een nieu liedt-boeck genaemt den druyven-tros der amoureusheyt

In hem begrijpende veelderhande amoureuse liedekens, te vooren in druck noyt uytgegaen

[p. 76]

Een ander,

Op de wijse: Ick claegh u Venus dieren, Op den naem Neelken.

NAcht en dach moet ick ker- men //
Om een die my behaeght,
Zy wil my niet ontfer- men //
Dit sy Venus geclaeght,
Cupido my seer plaeght //
Met zijn vlammige sprieten //
T'herte haer liefde draeght //
Sonder troost te genieten.

E en teer maegdelick herte
Is buyten haer geplant:
Al claegh ick haer mijn smerte,
Zy slaet my vander hant,
Ay my! t'herte verbrant,
T'leven moet my verdrieten,
Blijf ick in desen bant,
Sonder troost te genieten.

E erbaerheyt was ick biende

Altijt naer mijn staet,
Ken weet waer ick verdiende
Soodanich wreet gelaet,
Veel schamper woorden quaet
Wil zy op my wtgieten,
Dies blijf ick inden haet,
Sonder troost te genieten.
L iet ick (duer desen rouwe)
Haer liefde my afslaen:
T'waer een werck ongetrouwe,
Van my qualick gedaen,

[p. 77]

 

Liever int graf te gaen,

 

Dan zulcx my af te vlieten:

 

Al min ick haer voortaen

 

Sonder troost te genieten.

 

K iest zy my noch ten laetsten

 

Als haren Dienaer fijn,

 

Als ist ten alderquaetsten,

 

Ick sal genesen zijn:

 

Maer neen! nijders fenijn

 

Haer liefde van my stieten,

 

Dies sterf ick int gepijn,

 

Sonder troost te genieten.

 

E er Atropos schoffierich

 

My haelt int duyster velt,

 

Bid' ick Nemesis vierich,

 

Dat zy dit groot gewelt,

 

Qua tongen eens vergelt:

 

Die mijn schoon lief dit hieten,

 

Waer deur ick ben gequelt,

 

Sonder troost te genieten.

 

Prince.

 

N eemt dit weerde Princesse.

 

Voor een Oorlof gesanck:

 

Ghy zijt doch mijn Deesse,

 

Die ick mijn herte schanck:

 

Laet doch dit drouf geclanck

 

V eens ter herten schieten,

 

Ick sal mijn leuen lanck,

 

Daer duer veel troost genieten:

Doende leer-ick.