Een nieu liedt-boeck genaemt den druyven-tros der amoureusheyt

In hem begrijpende veelderhande amoureuse liedekens, te vooren in druck noyt uytgegaen

[p. 41]

Een ander,

Op de selue wijse: op den naem Elisabet.

EErbare, soete // ieught,
Bloemken weert alder eeren:
Dat u ontmoete // vreught,
Wensch' ick, int salueeren:
Ghy zijt voorwaer
Een Peerle onder vele:
T'elcken avont spele
Is uwen naem lofbaer.

L aet my dijn name // gaen

Vol prijsen naer haer weerde,
Siende bequame // aen
Hoe ghy betreet de eerde,
Seer minnelick
Moet mijnen geest ontspringen:
Ghy zijt in u dingen
Volmaect, godinnelick.

I onge volmaecte // bruyt,

Beleeft in u faconde<
Noyt man en smaecte // fruyt
Soo soet, tot zijn gesonde,
Veel smerte // dect
Ghy, deur troostbaer genesen,
V amoureus wesen
Liefs hert aen t'herte // trect.

S iende dijn wangen // root,

Int herte ick verschiete:
Ghy sult den strangen // noot
Dijns liefs, haest doen te niete:
Als hy sulcx merct,
Ghy bluscht hem al zijn pijne,
Soo de medecijne
Een crancke siele sterct.

A cht dit de waerheyt // al,

Noch meer mocht hier ontbreken:
Niemant de claerheyt // sal
(Dijns lofs) geheel wtspreken:
Doch euen wel
Al zijt ghy weert de croone,
Maeghden fris, en schoone,
Zijn meest haer lief rebel.

B loemkens van geure // soet,

[p. 42]

 

Connen veel schoonheyts dragen:

 

Maer u coleure // moet

 

My bouen al behagen,

 

Vaste pilaer,

 

Manierich, ende stille,

 

Coemt u liefkens wille

 

In alle heusheyt naer.

 

E s t'uwen houe // rijck,

 

Aengenaem dit gedichte:

 

Soo ist wel loue // lijck

 

Dat ick een schoon gesichte

 

(Deur dit cleyn werck)

 

Int minste mach believen:

 

Ick sondt anders brieven,

 

Waer ick ter cunsten sterck.

 

Prince.

 

T' is tijt om scheyden // nu,

 

Dits dan mijn supplieeren,

 

God wil geleyden // u:

 

Tot dat wy wederkeeren,

 

Princesse net

 

Wilt ons vrientschap niet mincken,

 

Alst u sal gedincken,

 

Peynst om my altemet.

Doende leer-ick.