Theatrum stultorum

Stvltitia
Blandorum Magistrorum.

Emblema.
Sus, quam digito Bubulcus titillat, in sordibus se volutans. Asinus, qui cantorem, & immoderatum suum blanditorem, ventris plerùmque flatu, & caudâ interdùm excipit.

Nocet indulgentia blanda.
Ad Hor. Od. 7. lib. 1.

POrcis ac Asinis nimis indulgere caveto,

Dum satagis prodesse, nocebis.

Sus glabra quam digitis titillat fortè Bubulcus,

In medias ruit illicò sordes.

[p. 142]

 

Dum canis Arcadicum blando pecus antè susurro,

 

Te stringet mox verbere caudae.

 

Te flatu absurdo ventris, crepituq́ue salutat;

 

Haec meritis tibi gratia fertur.

 

Discipulis nimiùm blandiris fortè Magister,

 

Nec caedis, dum crimina poscunt?

 

Credito me folium Euboicae recitare Sibyllae,

 

Si vacuum te dixero mente.

 

Dum nimis arrides, nimis abblandiris inerti,

 

Crede, noces, causasq́ue ruinam.

 

Nî punis, perdis; facit indulgentia pigros,

 

Ingratos, juvenesq́ue malignos.

 

Nulla tuis unquam respondet gratia factis,

 

Subsannant post terga docentem.

 

Si sapias igitur, plagosum age saepè Magister

 

Orbilium, rigidumq́ue Catonem.

 

Dum peccant, frangant ferulas, rubeantq́ue flagellis,

 

Defluat è cute sanguinis imber.

 

Persolvent, firmata viros ubi fecerit aetas,

 

Condignas tibi, spondeo, grates.