|
| |
| |
| |
Boneiru
Tokante di Boneiru sí mi por ‘dal saja den pia’ pa sinta konta te marduga grandi.
Den un frase mi por kuminsa na bisa, ku Boneiru tabata un paraiso di alkohol, muhe i wega di plaka.
Den un warda-kosta nos a bai Boneiru. Nos a marja manera porko. Anto den e kushína nan tabata prepara kumínda ku koffi. Nos no a hanja ni un sneif. Holo so.
Ma ora nos a jega den laman mas trankil, serka di Boneiru, tur hende su beis a drecha mesora. Nos a weta e kasnan di Plaja i e forti chiki kontra di laman. Nos tur a jega di tende e historianan fantastiko di e amigunan di nos ku a pasa un temporada fantastiko na Boneiru. Aki tabatin algu bon ta spera sin duda.
Den un di e kwartonan den e Forti nos a hanja nos luga di drumi. Ami a hanja e kwarto ku nan tabata jama ‘Hotel Mama’.
Djis despwes ku mi a akomoda mi mes, m'a bai para wak laman, pará den porta di Forti. Un mucha a jega serka mi, puntra mi mi nomber.
‘Si, ta mi mes. Pakiko?’
‘Mama a pidimi bin buska meneer’.
Ami di: Ta kla ta. M'a bai ku e chabalitu na kas di su mama. Loga ja kaba nan tabata na altura, ku mi ta biniendo Boneiru. A start un wega di domino ku brandy. I for di e prome anochi riba Boneiru mi amigunan mester a kargami, pone riba kama.
* * *
Di Forti nos tabata sali, bai hasi wárda na e kampamentu, kaminda e Alemannan tabata será tras di waja. Nos komedor, kamber i wárda tabata keda mei-mei. Pa parti di nort tabatin e kampamentu pa muhenan. Pa parti suid, kampamentu pa hombernan. Tur rondo tabatin un kaja di mas o menos kwater meter hanchu. Niemandsland. Ta nos so por a pasa ei riba, ora ta bai kambia wárda na e dos postnan ku tabatin. Un post tabata kontra di laman. E otro parti di kaja dilanti di kampamentu.
Un kos tabata teribel na Boneiru. Asina dies or bati, lus ta paga. Kajanan ta keda tristu, desolá. Den Forti nos tabata uza lanternu. Den kampamentu tabatin un motor pa duna lus. Aunke mi mester bisa, ku for di shet'or ja kaba tur kaja tabata plan barí. Ni un pushi riba kaja.
* * *
Fincho ku Dochi tabata e dos kòkinan den Forti. Fincho tabata kamna i papia meskos ku mariku. Su kara tabata lombra di vet. Su barika grandi tabata keda manera un bohoti su dilanti. Dochi, en kambio, tabata machu | |
| |
te bai. I fregado manera e so. Dochi tabata kria un porko pretu chiki, ku tabata pegá na su kurason.
Un tramerdia m'a sali for di ‘hotel Mama’, pasando den e plenchi di Forti. Ora m'a drei wak den kushína, m'a weta Fincho ku Dochi sintá ei den. Anto ku un pinset Dochi tabata piki plateis for di Fincho su kabeinan di wowo. Kada plateis tabata muri un morto kimá, riba e plachi kajente di heru kaminda tabata buta weanan di kumínda.
Boka habrí m'a keda wak nan un ratu. I Dochi tabata blo bisa Fincho: ‘Mira un kos aki, porko. Banja ku flit aworo. Banja tur bo kurpa ku flit. Ta sali mas barata, ku si bo pagami kada be un jotin pa ranka nan pa bo’.
Algun dia despwes, mientras mi ta drumi riba mi kama, lesando un karta, m'a weta kon riba e flur di ‘hotel Mama’ un kareda di plateis tabata pasando manera un parada. Tur mi kurpa a kuminsa hinka. Mesora m'a bula lanta, buska pomp di flit i huma nan ku ne. No a juda muchu. E luga tabata pestá. Ta pesei mester a tene ‘Platjes-parade’ den kampamentu. E dokter di Boneiru, un homber ku un figura i kara meskos ku un chimpanse, mester a listra kada polis. Tabatin gritu di harimentu i bochincha.
Majoor mester a kai aden, ora un polis a pidi e dokter: ‘Gewoon doorgaan met kietelen, dokter. Moet u soms een kam hebben?’
* * *
Webu tabata masha barata riba Boneiru. Dos plaka pa un. Esun polis ku tabata pinta na Berg Altena a kumpra bintisinku webu, herebe nan duru, i sinta kome nan den un suplá. E anochi ei no tabatin hende ku por a drumi drechi den su kamber.
Piská no tabata ni kos di papia mes. Sintá riba waf m'a jega di kwe basta piská. Unda ku bo tira linja, piská ta kome.
Un dia, na kampamentu, m'a mira un labadera jega ku un asechi pa un di e polisnan. Kuriosidad a butami puntra ta kiko. E labadera a habri e asechi, munstrami piská hasá, dorná ku sibjo ku tomati. Algu delisioso. Mesora m'a puntr'e ta kwantu e grasia ei ta kosta.
‘Kwarenta sen’.
‘Trese manjan pa mi tambe’. Asina ei m'a kome piská te fada riba Boneiru.
* * *
Ja ku mi a menshona e labadera ei, mi tin ku konta di un otro labadera, ku tabata biba pariba di Nikiboko. Un muhe ku un atras onbeskop.
Despwes ku el a laba panja pa mi varios be, m'a bin kompronde ku no ta panja so e ta laba. E tabatin bon kurason tambe. Anto grandi.
| |
| |
Un tramerdia m'a hala den solo kajente riba e kaminda di tera, bai pariba serka e labadera. Di antemano mi a laga e otro amigunan di mi splikami kon e aserkamentu tin ku bai. Pues mi tabata prepara.
Riba mi prome pregunta, e kontésta tabata: ‘Stop, shon, stop’.
Pero esei no a kita mi brío. Pasobra mi tabata sa ku ta asina e wega ta bai. Tabatin un mucha homber ta frega den kaminda. Pa e disparse, m'a duna dies plaka pa kumpra mangel. I djei m'a tow e brik, bai den su kamber ku ne.
Wel, mi no por ganja. Su moda di praktika amor tabata sublime. Aunke e barku grandi tabata pidi un kaptan mas fwerte ku mi, mi a logra pasa den e horkan.
Komo toke final e labadera a hunta tur mi kurpa ku awa di florida. Asina ei, ku e holo di florida pestá na mi kurpa, m'a baha pa Plaja atrobe, den solo kajente, riba e mes kaminda di tera.
* * *
No a dura muchu, ku mi tambe tabata metí den e weganan di plaka riba muraja di forti. Dow tabata lora ku ta tristu.
Den Forti no tabatin bibida sterki. Pesei nos tabata bai den un shap di tabla, kontra di awa i djis serka di forti. E shap ei a disparse. E tabata jama ‘Welkom’. Tabatin shap di Buchi tambe. Ei nos tabata bai hunga brial.
Alkohol a okashona basta kaso chistoso riba Boneiru.
Dia Maarten a hasi anja, el a kumpra dos botter di whisky, di galon. Tur hende a sinta chupa whisky. Mas den lat, banda di nueb'or di anochi, nos majoor a kuminsa grita, ku e ta kamna bai vliegveld na pia. E vliegveld biew tabata mas o menos mei-mei di Plaja i Rinkon.
‘Bo no por’, e polisnan a pusta ku ne.
Majoor a kita uniform, buta abow, keda na karson sijo, i pia abow. Jen di furia el a sali for di forti i tumba pa Breedestraat di Plaja. E ora ei tur e polisnan a spanta. Na trupa nan a kore sali tras di majoor, i rogu'e pa no kamna bai vliegveld na e manera ku e tabata bistí. Ku masha lidiamentu i trankamentu, nan a logra di karga majoor hiba forti atrobe.
Net ami mester a bai hasi wárda na e vliegveld ei. Mi tabata bon prepara pa pasa e oranan den soledad. Den kada saku di karson mi tabatin un botter plat di rom.
* * *
Na Rinkon nos tabata kumpra porko, pa mata i kushiná pa nos kome.
Dos polis a sali den e pick-up berde di nos, pa bai Rinkon. Pero na kada shap riba nan ruta, nan mester a para i dal un kos di kenta kurpa. Ta klaro ku sigun nan tabata jegando Rinkon, e pick-up tabata zwai manera kolebra riba kaminda.
| |
| |
Asina e porkonan tabata patras den pick-up, nan a bolbe tumba pa Plaja. Ma ... mester a bolbe bishita kada shap. Kon nan a jega bibu tabata un misterio.
Kestion ku tin, mas o menos enfrente di e santana katoliko riba Wilhelminaweg, nan a dal un buriku. E buriku a pega den e bumper di e pick-up, sin por los. Mientrastantu porkonan tabata grita patras den baki di e pick-up. Godverdomme a jobe. Ku nan kabes zorokloko di rom, nan a baha i purba saka e buriku. Nan no a logra. I di tal manera nan mester a pasa den kajanan di Plaja, te Forti. Ei otro polis a tira e buriku mata. Ku pata di kabra mester a ranka e buriku for di e bumper.
* * *
Durante di patruja ku barku di bela tambe rom tabatin e papel prinsipal. Mi di: Patruja ku barku di bela. I ta berdad mi ta papia. Un majoor di nos a inventa e idea fantastiko, ku nos mester bai hasi patruja ku un barku di bela, pa wak ... submarinu!
Dos polis, ku nan karabijn, i dos Bonerianu tabata subi barku tardisitu, pa bai liga asuntu di e submarinunan Aleman. Pero nos no tabata chocho ni animal. Asina e barku jega parti di nort di Boneiru, di moda ku for di Forti nan no por a mira nos mas, ta basha anker kontra di tera. Ei tur hende ta hala rom i drumi saka sonjo.
Mainta trempan, ora e kabesnan ta fresku, ta baha pa Plaja atrobe, pa nos meldu ku nos no a topa ku ningun submarinu.
* * *
Otro idea brijante tabata esun di hasi patruja riba kósta di Boneiru. Dos polis, ku e mesun karabijnnan di 1890, mester a kamna dos ora largu, den skuridad kompletu, pa weta ku si kwalke Aleman por a subi tera. Figurabo!
E krakstenchinan tabata lora bow di nos pia, buta ku bo no por kamna ni drechi. Anto te alew ajá bo por a mira e lusnan di kampamentu.
Chris ku mi tabata un be na un patruja riba kósta di Boneiru. Ta di kompronde ku nos alma no tabata den nos kurpa. Si Alemannan a subi tera, nan lo por a pipitá nos trankil.
Den esei nos a tende un kos move djis un par di meter nos dilanti. Mi kurason a salta un sla. Mesora nos tur dos a keda para ketu. Ku mi kokoti di man m'a tochi Chris, pa e kompronde. Chris a tochi mi ku su kabu di karabijn.
Boka ketu nos a keda para den skuridad, sperando e momentu ku un tiru ta krak den silensio i mata nos.
Chrrrr. E kos a bolbe zona. Nos tur dos a buta skopet kla pa tira. Chris a sende su flashlight, i ami a hisa skopet pone na skowru. E lus a | |
| |
dal riba un kangrew shinishi basta grandi, ku tabata lastra den e krakstenchinan.
Nos a grita hari i kai sinta un ratu pa huma un sigaria.
E zonidu lembelansa di laman kontra di kósta tabata divino.
* * *
Ma dia un submarinu di berde a hera di buta nos tur jena karson, tabata otro kos. Net m'a kaba for di e post kóntra di laman, den kampamentu. Pará riba e veranda dilanti di nos Warda, m'a tende telefon bati den e kwarto di nos Wachtcommandant. Tabata telefon tipo mulina di kòfï. E dos polisnan pará na e post kontra di awa a mira un submarinu, mas o menos dos shen meter for di kósta. Esun ku a mir'e prome, tabata un homber será den kampamentu, ku tabata para kombersa ku e polisnan na post. El a avisa e polisnan, i nan a jama wachtcommandant.
Por tabata un dies minut pasá di dos or di marduga.
Tur e otro polisnan a kore bin para riba e veranda. Sin por a bisa un pia di palabra, nos a mira e sombra pretu di e submarinu riba awa. Dries, ku tabata konose silueta di tur bapor den tempu di guera, a saka nos for di nos duda. El a rekonose mesora ku ta un submarinu Aleman.
E silensio riba e veranda tabata algu hororoso. Ami a pensa kon lo mi muri soketamente. Anto asina hoben. Djis aki metrajadora di e submarinu lo kuminsa basha bala. Lo tin algun gritu mahos. I despues nos tur lo ta kadaver ...
Kisas tabata unikamente dos o tres minit, ku e submarinu a keda riba awa. Pero a parsemi un eternidad. Djei el a slep bai, disparse bow di awa.
Tur hende a kuminsa borota mesora. Ta kon e no a hasi nada? E por a mata nos tur i kwe e Alemannan bai ku ne. Pakiko e no a tira riba nos? Ta kiko nan kier a bin mira?
Nunka nos no a hanja kontésta riba e preguntanan aki.
* * *
Dia m'a pasa un balente mal ratu di sustu, ta lo siguiente:
Un anochi, banda di kwartu pa dies, mi tabata sinta namora un galinja na Nikiboko. Prome mi sigui konta e fragmentu aki, mi tin ku bisa, ku e galinja ei ta esun di mas bunita ku mi a topa den mi bida. Sirkunstansha a buta nos hala for di otro. Pero ki ora ku mi tende nomber di Boneiru, kara di e galinja ei ta reis den mi sintí.
Bueno. Den dushi namoramentu, nos a tende un zonidu fwerte. Manera bala di kanjon. Mes momentu tur kombersashon a para. Tur hende a drei mira otro.
Djis despwes otro tiru pisá. Ta manera maribomba a pika tur hende den kas. Nan a lanta bula, kuminsa kore manera razu. Trupa di hende na | |
| |
gritu a kuminsa kore pasa bai pariba. Un auto, sin tajer, a ranka pasa. Masha hopi muhe tabata sklama desesperadamente.
E galinja a kologa na mi garganta i jorami: ‘No bai, mi amor. No bai’.
Den esei un metrajadora a kuminsa pipitá bala. Esta un zonidu seku, antipatiko. Siendo militar, mi a realisa ku mi mester a bolbe kampamentu mesora. E despedida di e galinja tabata amargo.
Na mi uniform berde - nos mester a kamna na uniform e tempu ei - m'a sali na kareda, pa jega kampamentu. Pa mi jega mas lihe, m'a krusa den e sabana ku tin ei banda.
Un muhe biew ku tres mucha chiki a reis riba mi for di tras di un palu. E biew a dal un gritu: ‘Aleman!’ i ranka kareda bai ku e muchanan.
M'a kompronde su sustu. Den skuridad mi uniform tabata parse esun di Alemannan. Jegando na e kaminda enfrente di kampamentu m'a bolbe tende un metrajadora skupi bala. Del tiro m'a laga mi kurpa kai den tera, i skucha ta di unda e metrajadora por ta tira.
Djei m'a dal un gritu: ‘Habri porta pa mi!’
Esun polis ku ta wak porta di kampamentu, a kore sali, dal e porta habri i bolbe saka kareda bai paden. Mi ta kere ku mi a krusa e kaminda di tera den menos ku dos sekondu. Morto kansá m'a kore drenta nos kwarto, kwe mi skopet ku mi pistol, pa para kla. Tur hende tabata prepara.
Mein ora despwes a drenta e notisia, ku ta un ehersisio. Loga ta nos majoor ku algun polis mas a hasi e wega ei, pa mira kon rapido nos ta bolbe den kampamentu.
Tur polis, sin eksepshon, a koba mama.
* * *
Ambiente di Boneiru ta algu ku hamas mi por lubida. E trankilidad agradabel, ora bo ta sinta riba muraja di forti, banda di atardi. Mirando solo baha. Skuchando e olanan chikitu ta chalala kontra di kósta. Wetando e barku mará riba bui, sigun e ta zoja. Calitu Nicolas, un amigu di mi, a jega di skirbi un poesia presioso riba e barku ei. El a mir'e meskos ku ami a mir'e.
* * *
Esun ku a bin kita nos trankilidad, tabata un hembra di Corsou. Mester ta ku el a tende, ku na Boneiru no tin puta. Pesei el a barka bini, pa komplase polisnan.
E prome dia ku el a jega, el a pasa pronk dilanti di forti, pa nos tur mira kiko e tin di ofrese. Un zoja. Un sonrisa i un kurpa di kita sombre. Ta manera bo a tira un pieda den un neshi maribomba. Polisnan a bira | |
| |
razu. I mes anochi e kas di tabla korá, den kaminda pa kampamentu, tabatin monton di bishita. Pero e bakanal a bira asina teribel, ku despwes di dos siman Gezaghebber a saka e hambra bon for di Boneiru.
Ta e mes hembra aki tabata pará ganchá ku nos majoor den Keukenstraat.
* * *
M'a jega di konta kon nos tabata kwe bala ora di ehersisio na Hato.
Wel, mi resérva di bala, a fasilitami den tiramentu di juwana, djis pabow di Lac na Boneiru.
Un dia mainta nos mester a bai, den truck di sushi, ku poko Aleman, pa nan drecha e kaminda di Lac. Mientras nan tabata karga pieda, mi a sinta huma mi sigaria.
Ora di bolbe kampamentu, mi di ku nan, ku mi ta bai tira dos juwana ku sa drumi banda di un binnenwater. Pero nan perkura sera nan boka, sino nan ta weta kiko mi ta hasi ku nan. Tur kwater a bai di akwerdo ku mi. Nan lo no tabatin gana di pasa pa historia.
E truck a para na un distansha di e binnenwater, ku e Alemannan sintá patras den baki. M'a laga e shafer ku su kompanjeru bai shi e dos juwananan pa mi, mientras ku mi mes a drumi plat abow na swela, warda nan kore bini riba mi.
Esta un bista mahos, ora bo mira un juwana den kareda.
M'a los un bala. Nada. Un juwana a kore pasa banda di mi i disparse. Di dos bala riba e otro tambe a faja. Juwana a pasa manera welek.
A dwel mi. Pasobra m'a keda ku mi deseo di kome juwana stobá.
* * *
En kambio kiwa sí tabatin na kantidad. Den un bleki grandi nos tabata kamna piki nan kontra di laman. Djei ta herebe nan. Kada polis tabata sinta ku un sambechi, korta e parti patras di e kiwa, dal un tiki píka riba dje, i kome jena barika.
No laga nan ganjabo, ku kiwa tin siertu efekto espesial. Nunka nos no a sinta diferensha, despwes di ocha kiwa.
* * *
Un tempu nos a kome poko pan riba Boneiru, ku tabata exaktamente meskos ku bals. Prome ku bo kuminsa kow e, bo ta sinti kon e ta keda peche-peche den bo boka. Karni di kabai tambe nos a kome. Un polis tabatin un kabai biew. Kon ku el a hasi su kwenta, el a bende e kabai ku majoor. I nos a supla karni di e kabai, sin sa.
* * *
| |
| |
Un bispu di anja nobo nos a bira bestia. Awor mi tin ku splika ku nos tabatin e kustumber na Rio Canario, ku bispu di Anja Nobo nos ta hanja krentenbollen ku chocolademelk.
E Alemannan será tras di waja a hanja bibida. Nan tabata stom kanjá. I nos no a hanja ni sikiera un limonada. Sorto di kos stranjo asina ei a pasa.
Algu mas stranjo ainda ta e asuntu di notisia di radio.
Den e kwarto di nos wachtcommandant na kampamentu tabatin un radio. Riba dje tabatin dos loudspeaker komunika. Un den kampamentu di muhenan. Un den kampamentu di e hombernan. Anto nan por a tende notisia di Curom.
Riba un dia mainta nos majoor a kaba di sali serka e Alemannan. I el a bisa nos wachtcommandant, ku e Alemannan tin deseo di skucha radio di Alemania. Mesora e brigadier wachtcommandant a saka su pistol i bisa majoor: ‘Ata e radio. Bo por pon'e na stashon Aleman’.
Majoor a kompronde ku e fli ei no por subi. El a lora palabra, sali bai.
E brigadier a bolbe warda su pistol.
* * *
Algu similar ta dia Benno a kasa. Ta klaro ku el a invita tur su amigunan na kasamentu. Ami tabatin unikamente mi uniformnan, komo e tempu ei nos tabata obliga di bisti uniform stret bai.
Anto mi galinja tambe tabata bai fiesta di kasamentu.
Sintá riba e trapi di nos veranda den kampamentu, m'a wak kada polis ku ta pasa, pa mira ku un di nan por tin mas o menos mi tamanjo. Den esei m'a hanja un. M'a splik'e ku mi tin ku bai kasamentu, pero ku mi no tin un flus ni sapatu. For di su maleta el a saka un flus blow skur i un par di sapatu pretu pa mi. E flus a kedami awit. E sapatu tabata tobo na mi pia. Pero kestion ku tin m'a bai kasamentu ku e galinja.
Algu prome ku dies or m'a bolbe kampamentu. I djis despwes e otronan a jega den un auto wabi ku un polis a kumpra pa dòròdòsplaka.
Bow di gritu: ‘Leve de Koningin. Weg met de rotmoffen’, nan a kore drenta kampamentu. Mesora e Alemannan a sali for di nan barak i kuminsa kik, ku nos a ofende nan.
Un polis auxiliar, ku antes tabata traha na Isla, a bira bestia. Pasobra un ju di dje tabata aviador. Anto tabatin dos luna ku e no a hanja notisia di su ju. El a bula kwe su skopet, hinka sinku bala aden i ranka bai pafo, pa tira tur e Alemannan mata. Dos otro polis a bula riba dje, i splik'e ku ta den baina e ta hinka su kurpa. Nan a bin logra kalma e homber.
Bo ke kere ku su manise e Alemannan a manda u karta di reklamo pa e luitenant ku tabata nos komandant na Boneiru?
| |
| |
Chris a hiba e karta. I Chris a keda wak e luitenant duru den su kara. E luitenant a kompronde ku e kos ei si a pasa meta. Sin papia un palabra el a sker e karta, tir'e den kaha di sushi, dilanti di Chris.
* * *
Inkreibel ta e motibu pakiko nan a barka un polis, manda Corsou.
E homber aki tabata pará na post, kontra di laman, den nos kampamentu. Sigun su consigna, skirbí riba un pida karton, kologa den e kasita di e post, el a obra. Un Aleman a landa bai muchu afo, ora nan tabatin okashon di landa. Teniendo kwenta ku su consigna, e polis a grita e Aleman ku e mester bolbe mas paden. Esaki el a hasi dos be. Sinembargo e Aleman a hari i sigui landa bai mas pafo.
E segundo paso pa e polis (sigun su consigna), tabata di los un bala den direkshon di e Aleman. Morto spantá e Aleman a landa bini tera mesora. Pero e polis mester a barka bai Corsou mesora. E tabata ‘ongeschikt’ pa Boneiru ...
* * *
Pero senjora di un hefe haltu, kende tambe tabatin sintimentu pro-Nazi, NO tabata den kampamentu.
Tabatin e kaso (te awe misterioso) tokante su esposo, kende a lusa ku flashlight riba kósta. Parse ku ta pa avisa submarinu Aleman. Mi no tabata presente. Pues mi no por huzga. Pero pa puru kwasalidad mi a hanja e reportahe riba e kaso ei den un map koló mamanja, tempu nos tabata biba na Penstraat 24.
* * *
Tabatin bapor di pais neutral ku tabata kumpra zeta. Despwes parse nan tabata traspasa e zeta pa bapor i submarinu Aleman. Parse ku tabatin karta sekreto riba e asuntu ei. Mi di: Parse. Pasobre tin hopi kos ku mi sa ku siguransa, pero lo mi papia kla ora e momentu jega.
No lubida ku tabatin dos ofishal, ku a tira kurpa mata den Penstraat!
* * *
Pará riba post na Boneiru, nos a jega di kombersa tantu kos stranjo ku nos tabata sa. Mientrastantu e gran komedia tabata sigui pasa nos dilanti. Un komedia barata i ridikulo.
Grandinan tabata buska moda pa tira kulpa riba nos, ora kwalke asuntu resulta muchu pertá. Pero nos tabata sa di saka nos kurpa. Asina a sosode, por ehemplo, dia ku e Alemannan a hui for di Boneiru.
| |
| |
Hopi tempu di antemano nos a avisa, ku tin e posibilidad pa hui. Lus no tabata sufisiente. Pero dia ku e Alemannan a hui na bordo di e barku di bela ‘Bellisima’, mesora grandinan a bula bin Boneiru, pa weta ku ta nos tin falta. Mi ta korda kon gobernador tabata para skuma den nos kwarto na kampamentu. E kièr a sa ku ta nos falta. Ma dos di nos a laga tur e grandinan para na post, mientras dos polis a slep sali for di kampamentu. Ningun di e hefenan ku boka grandi no por a mira e dos polisnan sali for di kampamentu. Esei a salba nos.
* * *
E huimentu di e Alemannan tabata masha interesante.
Enfrente di kampamentu tabatin un terenu di deporte pa nan. I hopi dia di antemano nan tabata hiba bleki di kumínda, skondé den dekel, bai warda bow di tera riba e terenu di deporte.
Te dies or di anochi lus elektriko tabata sende rondo di kampamentu. Prome ku esei nos mester a lusa ku un schijnwerper di bateria riba e pida Niemandsland. E lus tabata asina un bilorio, ku apenas bo por a mira algu. Ademas tabatin un mancha grandi kaminda zeta a basha riba Niemandsland. Net ei riba e Alemannan a lastra riba nan barika, sali bai, prome ku dies or di anochi. Djei nan a sigui lastra riba nan barika, krusa e kaminda di tera dilanti di kamp, bai na e terenu di deporte. Ei nan a kwe nan blekinan wardá.
Nan a dal un bwelta grandi, pa jega kaminda ‘Bellisima’ tabata riba anker. Pushi-pushi nan a landa bai na e barku, korta kabuja di anker, pa e anker no hasi zonidu. Despwes ku koriente a hiba e barku basta pafo, nan a hisa bela bai.
Te serka kósta di Venezuela aeroplanu a bin hanja nan.
Ta klaro ku despwes di esaki, nos a hanja motor grandi ku lus di mil wat na kada post. Ora e baka a hoga na pos. Ma kestion ku tin grandinan no a hanja palu pa dal e kacho.
* * *
Ma laga nos lubida kos laf. Ami mes ta prefera korda kasonan chistoso.
Jacho ku Dois, dos amigu di mi, tabatin mas o menos dos siman riba Boneiru. Anto jen di gana di hanja un galinja. Pero sweltu no a toka nan banda. Bon sará nan tabata kamna keiru un anochi, den direkshon di Forti.
Den esei nan a pasa dilanti di bentana di un kas, mira un mucha koló indjan, kabei largu pretu, ta para penja dilanti di su spil. Mester ta ku Jacho i Dois tur dos a perde kontrol. Tur dos a bula bentana parew, kuminsa brasa i sunchi e galinja.
E mucha su grita di ansha a buta nan dos bula bentana atrobe i lembe pia-kome-ninga te Forti.
| |
| |
Su manise e mucha a bini serka nos adjudant, huntu ku su tata i su mama, pa weta ta kwa ta e sjowrunan ku tabata asina abuzador di bula den kas i primi su ju muhe.
Adjudant a buta tur polis para na kareda, pa e mucha mes rekonose ta kwa ta e dosnan. Ma tabatin un detaje ku e mucha no a tene kwenta ku ne. Ora Dois ku Jacho a bula bentana, nan tabata bistí na karson ku kamisa. Ma ora nan tabata pará na kareda den Forti, tur tabata na uniform. I den uniform tur polis ta parse otro.
E mucha a kamna wak kada un di nos den kara. Dois ku Jacho tabata soda zeta. Nan por a deposita un bokkel e momentu ei. A la fin a la fan e mucha a bisa majoor, ku e dosnan no ta den e kareda pará.
E ora ei majoor a bira bedem. ‘Pakiko bosnan ta bin molostiami anto ku pantomina, butami lanta un set di hende for di nan sonjo?’
Tata, mama i mucha a sali bai ku kara masha halá.
Dois ku Jacho a kore bai dal un trago den ‘Welkom’ mesora, pa selebra kon nan a skapa.
* * *
Bo sa ki dia m'a hari te lora bow? Dia un barku di bela Dominikanu a jega Boneiru, jen di muhe. Ta kiko a pasa, ku nan a bini Boneiru, nos no por a kompronde.
Un majoor di nos, muherero manera e so, a weta e barku jen di muhe, ora e tabata pará riba muraja di forti. Mesora el a invita nos pa ban kore un paranda ku e muhenan.
Ami i algun polis mas a bula pipa. Majoor a jama nos sokete.
Pero algun dia despwes ta nos a grita hari. Pasobra majoor ku e otro polisnan a hanja un ‘ferkout’ ku mester a kura ku remedi ku no jama Mentolato, ni jerba herebe ku aspirina.
* * *
Bo sa pakiko hopi polis kier a bai Boneiru? Wel, aja riba bo bida tabata mas liber, menos militarismo. Bo tabata skapa e malditu ehersisionan den bo ora liber. No tabatin mester di limpia skopet ku pistol hardi bai.
Si b'a mira e polisnan subi wárda, lo bo a hanja dwele di nan. Sapatunan sushi. Skopet un klompi di heru frus.
Mi no sa kwantu be me mester a tene varios di mi amigunan bow di nan brasa, ora nos ta para na kareda pa subi wárda di anochi. Nan tabata asina kanjá, ku mester a lastra nan, bai pone nan riba post. Pero no tabatin peliger. Pasobra semper nos tabata nos dos na post. Te na ora esun ta ronka, e otro ta wak.
A bai asina lew, ku despwes nos tabata tira lot, pa mira ken ta drumi prome. Dos mantel tabatin den kada post. Esun ku ta su turno di drumi, ta habri un mantel abow i lora e otro na forma di kusinchi. Pero tabata | |
| |
un lei ku nunka a mira papel, ku esun ku ta bai drumi, mester duna e otro su paki sigaria, pa e otro huma, pasa tempu.
* * *
Den kampamentu tabatin un kareda di W.C Esta poko buraku, ku e fórma di tabla riba nan i un tapadera. Un muhe gordo tabata tene e W.C. limpi. Ta di kompronde ku e shon ei tambe tabata hole fonjeke.
Bo ke kere ku un polis (e mester tabata desespera) a jega di tuma den ku e muhe di W.C.? Anto gaba despwes tambe ku e ta bon?
* * *
Djis banda di W.C. tabatin nos banjo di ducha. Ei nos a jega di banja un amigu di nos, e mainta prome ku e bai kasa.
Frans tabata porko te den su higra. E tabatin miedu di awa. Su flanel sa keda mas di dos siman na su kurpa, te bira koló di tera. Ta djis su kara so e tabata sa laba den purá.
Dia e ta bai kasa, nos kwater a his'e for di su kama, hib'e den banjo. Nos a kibra su flanel i su karson sijo, frega tur su kurpa na habon, lab'e pa kita kolo-kolo. Frans a keda meskos ku nobo.
Mi ke sa kon a par'e despwes ku el a kasa.
* * *
Dia bebementu di rom a pasa meta, majoor a disidi di saka un ordu nobo. Ken ku nan hanja ku bibida, ta hanja kastigu mesora.
Pero Maarten no por a laga rom para. El a buska, te el a hanja su solushon. Sintá un anochi den nos komedor na kampamentu, Maarten a pone un termu koló di plata riba mesa. Ku masha delikadesa el a basha algu for di su termu, supl'e purá-purá i manda den garganta.
Majoor ku tabata sintá ku algun di nos na e otro skina di mesa, a puntr'e: ‘Lekkere koffie, Maarten?’
Maarten a traha kara mahos, guli, supla i kontestá: ‘H ... h ... ja majoor’. Holo di rom a jena henter nos komedor.
Un otro polis, un krenchi mas bibu ku Maarten, tabata meskla koffi ku rom, i kamna parti pa tur hende. E ta smak fatal. Esei mi por bisa. Pero gana di bebe a buta tur hende guli e meskla.
* * *
Tur kos tin su fin.
Dia mi a bolbe Corsou i laga Boneiru mi tras, mi por a jora. No unikamente pasobra mi a laga e galinja mi tras, pero Boneiru mes a kapta mi kurason. Por siertu te awe el a keda pa mi e isla ideal, kaminda m'a pasa tantu ratu sublime.
|
|
Auteursrechtelijk beschermd