e otro muzikantnan ta sigui kompanj'e. Di alew ajá e trompèt tabata kanta su tristesa, manera un alma bandoná. I tur hende tabata baha bos, pa skucha e melodia den distansha, e amargura di e trompèt solitarjo. Tur namoramentu tabata para. E káranan ta kambja i esnan ku ta kèjru, pasa rondò di Awasa, ta pausa un ratu. Un emoshon ta mara tur hende su pensamentu. Ningun ta riska papja...... pasobra e trompèt...... e trompèt...... ai, esta bunita...... sublime......
I despwes nan ta dal aden ku un marcha alegre di Sousa. Ej den Pa-Toro ta ronka su tambú, marsjal, dominante, eksitante. Ku muzik asina ej mi ta baj guera trankil, sin pensa. E parehanan ta bolbe sigui kèjru, tirando flor. Palabra dushi di un jònkuman i sonrisa tímido di un galinja ta bolbe pasa den mi sintí. Un sòldá bjew di V.K.C. ta hanja brijo i e ta konta un machi gordo riba asera di su tempu bon ‘si, shon mama. Di shon Kai Winkel; ora nos ta tene parada’. Bida, Pa-Toro! Bida! Tóka, kánta kornetín. Gríta, klarinèt. Mi ta marcha baj sin mi sa...... Aplauso! Pweblo, bati man.......
Ma apenas e ultimo akorde a muri baj den bjentu, ku elegansja di un wals di Korsow ta lastra nos baj ku ne den su ritmo romántiko i sentimental. ‘Dushi, bonochi’. Un harí manera zjampanja. Dos wowo kanaja. Un boka chikí: ‘O, ju, ta ki falta bo?’. Ta e wals a tolondrami. Mi ke namora, den e bjentu fresku ku ta bati den mi kara. I e zonidu di laman...... e streanan na shelu...... si, mi ke namora......
Un túmba su tras, kajente, marká, píki-ta píki-ta píki-ta. Ej ta palu! Zója pa nos baj......
Kiosko di nos tur; lakr a hala tapa. Ta di bèrdè mes bo ta baj. Ma mi tambe ta na mitar di kaminda. Nos aki ja ta stranjero, pasahero, nos mishon ta kumplí. Ma nos lo konformá, pasobra manera mi ta mira 'ki, no tin moda di hasi mas. Ta kambjo, mi ruman. Tempu ta eksigí. Ta tráfiko, ansha, nèrvjo, purá. Si mi ruman, t'esej t'e kos. Mundu tin purá Pero purá pa jega unda?
Auteursrechtelijk beschermd