Mi lenga. Deel 1

[p. 15]

Di kwater les

A pasami ya mil be,
ku mi ta sinta hopi ora,
meditando ki mi skohe
komo alma di un poesia
pa mi pinta riba mi papel.

Manera t'un kos imposibel;
ta parsemi ku mi fantasia
a bandoná mi pober pluma;
komo si fwera mi sintimentu
a kaba na mi delaster poesia.

En kambyo awor sin meditá,
m'a spyèrta k'un inspirashon.
No ta presente ningun intenshon.
di sinta konstruí kwalke obra,
ma mi pluma a yora di alegria.

Na momentunan asina
mi ta biba den un shelu;
mi ta testigwá ku den tur kos
ku Dyos a disponé pa nos
tin bida, i semper bay tin poesia.

Di ‘Capricho’, Edward A. de Jongh

1.	Trata na konta ku bo mes palabra kiko a pasa e poeta.
2.	Alma di un poesia (e prome idea, pensamentu, e fundeshi, e base)
3.	Pinta riba mi papel.
	E no ta bisa skirbi. Pakiko?
4.	M'a spyèrta k'un inspirashon.
	Ke men ku el a lanta for di un sorto di soño, i hañ'e ku un tema.
5.	Ma mi pluma a yora di alegria.
	Di kon ‘pluma’?
6.	Mi ta biba den un shelu.
	Splika ku otro palabra loke e ke men.

[p. 16]

Meditando, pensando. Filosofyá, kibra kabes. Dos o mas hende ta bati kabes huntu. Pensa lew.

Bandoná, bay laga, laga na kaya, laga pa su kwenta, bira lomba bay.

Delaster, ultimo.

Konstruí, komponé, traha, forma, modelá, ideá, formulá.

Den un shelu: den su glorya, den su hehéhe, den su zjoli, na su patarata grandesa.

Provèrbyo

Yoradó no sa yora largu

(Tristesa no ta pa semper)

Hasibo surdu, pa bo biba riba mundu.

(No preokupa ku tur kos)

Si bo fòrsa busá, busá ta papya latin

(Ora un pushi hañ'e den pèrtá, e ta tira tur sorto di salto)

Ora bo ta bow di palu, bo mester wanta kaka di pára.

(Bo tin ku soportá hopi kos den e sitwashon ku bo ta)

Moda di ekspresá

Pa su alma no deseá.

Dun'e tambe un pida kokada, pa su alma no deseá.

(Pa e no keda ku gana)

E yònkuman ei tin kabes di pal'i maishi.

(Bobo, tapá) (E no ta seryo)

Kaminda mi kay awe nochi, ni pitiseli no ta nase.

(Mi ta asina kansá, ku lo mi drumi un halá te mainta)

Mi no ke mira Janshi ni pintá.

(Mi no ke sa nada di dje).

Ey den tabatin dos pipítá di hende, (masha tiki)

Pipíta di maishi, bonchi.

E muzikant a pipitá kwèrdè di su gitara (piki kwèrdè)

[p. 17]

Ehèrsisyo

1.	Ta .................. un wals
	Ta .................. un kas
	Ta .................. un pensamentu den un frase.
2.	El a mira .................. pa un pampuna.
3.	E hòmber riku por a biba na su ...............
	Ora e mucha muhe a aseptá su proposishon pa kasa, Alberto a sinti'e den .....................
4.	Un mucha muhe loko-loko tin kabes ..................
5.	Mi no ke sa nada di dje; mi no ke mir'e ni ...............
6.	Uza un provèrbyo pa ‘Tristesa no ta pa semper’.
7.	Ora bo ta bòw di palu ..................
8.	Pober Teofil tabata sinta .................., pa e bini kla kon ta duna tantu yu kumínda tur dia.
9.	Bira lomba pa mundu ta nifiká ..............................
10.	El a para kaba na nada, keda blo bashi. Esaki ta meskos ku ‘El a ..................... na bida.