su boka. ‘Mi ta korda bon. E homber ei tabata balente ferfelu. Mira aki. Bo ta korda su mantel blow skur i su sombre di kabana, kologa te patras den klas?’
‘Si, tras di e prome kareda di banki’.
‘I bo ta korda dia el a para jora, pasobra el a hanja su mantel tur kortá?’
‘Awor ku bo ta bisa e kos ei, mi ta korda bèrdè. Ma bon, porfin ta kwa mucha den klas a korta su mantel?’
‘Lagami kontabo' Pursi a pasa asina tantu tempu, ku mi por bien konta’.
M'a komoda mi lombra kon tra di e banki, krusa pia, pa mi tende Pasobra semper a keda un misterio pa mi, ta ken den nos klas por a korta Bennart su mantel. Ta manera te awe mi ta mira e homber ta jora amargamente. El a puntra ta ken. Pero no tabatin kontésta......
Luis a grawata kabes, puntrami ku mi ta korda Chal, Oswald, Elias ku Mario.
‘Sigur sigur. Chal qu Oswald den e prome banki. Elias ku Mario den di dos. Abo ku Hector den e di tres’.
‘Exaktamente. Kestion ku tin Bennart tabata skirbi un kos riba borchi. Chal a saka tapadera di inktpot riba su banki, tir'e riba Bennart. E tapadera a hera, kai na swela, lora bai. E ora ei Chal a bira, kwe tapadera for di e banki di Elias ku Mario, tira Bennart ku ne. Esei tambe a faja. Chal no a keda satisfecho. El a rek man, kwe e tapadera for di mi banki, hul e den Bennart su lomba.
Bennart a bira di golpi, mira kon e tapadera a lora bai te dilanti di su eskritorio. Mesora el a tira un bista riba e bankinan den klas, i ripará ku mi inktpot no tabatin tapadera. Mester ta ku su bista no a kai riba e dos bankinan mi dilanti. El a bira kòrá, ranka bin riba mi ku tur su furia. Aunke ami no a kalkula ku e ta hasimi algu. Bru, e homber a tira man kwe mi, lastrami for di banki, kargami un par di wanta, ku a butami kore kabes di gai, bai basha bow te den porta di klas’.
‘M'a interumpi Luis, bisando ku mi ta mira te ainda kon e kos a bai.
Owel, bru, m'a bira bestia. Pasobra mi no a hasi nada. Anto Chal a sinta hari. Ko'i chombon. Pero mesora m'a kuminsa pensa kon mi por baha mi vengansa riba dje. Mi no a bisa ningun hende nada.
Dos dia despwes m'a bini skol ku un blet nobo. Merdia, ora nos a baha bai den e komedor grandi, m'a kome mi pan purá. Mesora despwes m'a subi trapi, bai den nos klas bashi. Mi kurason tabata bati te den mi garganta. Mi tabata spantá, pero disididu. Mi tabatin un rabia den mi kurpa. M'a para patras den klas, kaminda e mantel ta kologa, i pasa e blet mas di djes be den e mantel, di ariba te abow. Mi tabata gosa sigun e blet ta korta e mantel. Sigun mi e mantel tabata Bennart su kurpa. Pesei m'a pasa e blet ku vengansa.
Ora m'a sali bai, mi pianan tabata tembla. Pero m'a sintimi satisfecho’.
Luis a grita hari falsu, tira su kabitu di sigaria afo, grawata su kara
Auteursrechtelijk beschermd