Kwenta pa kaminda

E ihá di kompèr

Antajera Obencio a dunami un kabe'i boto, banda di sink'or di atardi.

‘Pero bo sa kiko?’ e di ku mi, ‘mi mester pasa mira mi ihá un ratu. Djis nos ta sigui atrobe’.

Mi ta gusta mucha chiki masha tantu mes, di moda ku mi no tabatin

[p. 32]

nada kontra. Obencio a lora drenta den un kaja smalitu, i para su auto dilanti di un kas di tabla basta mankaron. Ora el a baha for di auto, mi a ripara ku e tabatin den su man un paki di bruki i un bleki di lechi puiru.

‘Bo ta baha un ratu?’ Obencio a invitami. ‘Mi ta serabo konosi ku tata i mama di mi ihá. Kedabo trankil. Djis nos ta sigui’.

Obencio a kamna drenta sin bati porta, i ami a sigui su tras. E muebelnan den e pidasitu sala tabata pobersitu pero limpi. Den un huki parti pabow tabatin un fonograf model di 1930 riba pia haltu. Un imagen di San Hudas Tadeo ku poko flor di papel su dilanti i algun potret moda biew tabata dorna e murajanan.

‘No papia duru’, Obencio a pidimi. ‘Chenda ta hasi e ju drumi’. El a kamna riba su punta di pia i drenta un kamber na man robes. Enberdad mi a tende stem di un muhe ta kanta: ‘Drumi...... juchi...... drumi...... mi juchi’.

M'a kai sinta lenchi-lenchi den un stul di ki-mi-ke-hasi i spera. Tres pushi flaku di diferente koló a kamna drenta, i un di nan a kuminsa lora rondo di mi pia.

E porta di kamber a keda na kap, pero no ku mi por a weta den kamber. Mi kuriosidad a buta mi oreanan lanta para manera antena di radio, di moda ku mi por a skucha e siguiente kombersashon entre Obencio i mama di e kriatura: ‘O, kompèr, kon kompèr a pasa awe? Anto ta awor ei Sherlin a pega sonjo. B'a topa ku Papai kaba?’

‘No. Mi n' mir'e ainda. Sigur lo e ta tof er ku su puitunan den kurá’.

‘Ai, kompèr, bo mes sa. Ta dos kos ta Papai su lokura. Mucha chikitu i bestia’.

‘I kon nos juchi a pasa awe?’

‘Kompèr, mi n' mira mucha mas bon mucha ku Sherlinchi. E no ta stroba nos ku nada. Bo mes sa kon Papai sa gusta sinta kabishá banda di tramerdia, ora e kaba di dal su kòfi ku buskuchi. Papai ta drumi ronka sosega di dje. Ami ta bari kas, kushiná, laba panja trankil di mi. Kada dos ora mi ta kambia Sherlin su bruki’.

Den esei m'a tende un stem pisá ta papia: ‘Ata komper Obencio.

‘Papa Chal, kon ta ku e bida?’ Obencio a salud'e.

‘Wanta wanta, komper. Wanta riba furu di manga di zjilet. Kompèr ta pasa tira un wega di domino aworo?’

‘Mas ku klaro. Pero nos no ta stroba nos juchi di drumi?’

‘Nos ta sinta patras den plenchi. Eh...... kon kompèr ta hanja e kama ku m'a traha pa Sherlin?’

‘Masha bunita. Caramba, kompèr Chal, ainda bo no a lubida bo fishi di karpinte’.

‘E kurpa a bira poko krekeché. Pero mi t'ei ainda’.

Porta di kamber a dal habri. Obencio, Chenda i Papa Chal a drenta sala, pa bin sera konosi ku mi. Sigun mi kalkulo e homber tabatin su setenta anja i e muhe banda di sesenta. Mesora m'a lanta for di mi stul i sera konosi ku nan. Ma stret bai mi tabata purba di mira den e kamber. Pa mi por mira miho, m'a dal dos stap na man drechi. I sigun e tres hen-

[p. 33]

denan a sigui papia, m'a wak bon den e kwarto. Den un kama di ju chiki, tapá ku muskitero di twil, tabatin un popchi grandi di karet, drumí pechu ariba. Ta klaro ku m'a keda tur babuká. Pero m'a domina mi mes pa mi no puntra nada, pa mi no pega barku.

Despwes ku nos a jama e tata i e mama ajo i drenta auto, m'a bula riba Obencio ku e pregunta: ‘Bru, bisami un kos. Ta abo ta loko o ta e hendenan ei su kabes no ta parew?’

Obencio a keda wetami duru den mi kara, sin kontestá. Ma despwes di un ratu ku nos a sigui kore den kaminda grandi Obencio di ku mi: ‘Hermano, den e mundu aki tin masha kos ku hende mester mira i tende sin puntra’.

Pa mi no tabatin otro manera sino di keda ketu, sin puntra nada mas. Di moda cu te awor aki mi no por a hanja un splikashon pa e ihá di karet.