Kwenta pa kaminda

Banana

Ku mi propio bista m'a mira e kos aki sosode, djis na skina di brug di Skalo, kaminda tin e borchi ‘Seamen's Home’.

Un moveshon rapido di algu a hala mi atenshon, ora mi tabata pasa ei banda un ratu despwes di mitar di sinku. M'a bira kara purá, net na ora pa mi mira kon un banana hechu a pasa di un man robes pa un man drechi, pa despwes e disparse den un saku di papel riba asera.

Mi di: Karamba, e gengu ku a hasi e kos ei ta djak'i kanja. E mester tin masha brio pa praktiká ligeresa di dede di dia kla. Mesora m'a traka riba asera, pa mi weta ta ken e gai-bibu ta. Tabata un tersio chikitu, flaku, den un karson balente sushi i un flanel ku binti anja pasá tabata blanku. Na su pia e tabatin pargata pretu biew i plamá. Su kara tabata lombra di zeta. Su expreshon tabata bobo, aunke no tabatin motibu pa duda di su inteligensia natural. Pasobra e manera ku e banana a disparse, sin e Venesolanu sa, tabata trabow di un experto.

Den mi mes m'a pensa: Warda un ratu mas. No bai ainda. Maske na kas nan ta sperami ku un bon konchi di koffi.

E ora ei m'a hasi komo si fwera ta Postkantoor mi ta para wak. Pero ku mi wowo di banda robes m'a keda peilu e gai. A pasa algun minut. Empleadonan di gobiernu tabata pasa bai kas. Hopi galinja bibitu, ku lomba i pia masha agradabel tabata janga pasa mi dilanti. Mientrastantu e gengu a keda kologa kontra e pida muraja kaminda e Venesolanunan ta pone fruta.

[p. 14]

‘BANANA’
.........djis na skina di brug di skalo.........

[p. 15]

Aki tabata un kestion di pasenshi. Mi mester a warda. Pasobra ku un banana so e gai lo no por a jena su stoma. E mester a flektu un mas.

M'a wak e diferente monton di banana. Na man robes di e tipo tabatin un monton di dos. Tur e otro montonnan tabata di tres. Tabata masha stranjo ku e Venesolanu gordo no a ripara nada. E tabata kombersa ku un otro paisanu di dje. Un radio chikitu di bateria, pone mei-mei di e tomatinan, tabata pua pa toka un merengue.

‘Ke tal, parna?’, m'a tende e gai dirigi su mes na un homber ku tabata pasando. Mesora el a kita, pa bai kombersa ku su amigu, i laga e saku di papel trankil riba asera. M'a hanja e kos ei kriminalmente bon hasí. Ni sikiera el a drei wak e saku di papel, mientras e tabata papia.

E kombersashon a resulta kortiku. Nan a duna otro man, i e ladron di banana a bolbe bai para na su puesto estrategiko, ku kara serio, manera hendenan ku ta sinta warda nan turno den ofisina di dokter.

Pero despwes di e intermedio aki e kos a bai rapido. E gai a keda mira stret su dilanti. Mientras e dedenan di su man robes a hasi manera nan ta toka tambu poko-poko, e mes e para inmovil. Den esei su dedenan a kamna lenchi-lenchi, bai den direkshon di e banana mas serka. El a fula e banana ku djis un punta di dede. Djei m'a ripara kon su wowonan a bula bai bini, di robes pa drechi. I...... vjup! Di dos banana a pasa di man robes pa man drechi. E banana a zona ‘budum’ den e saku di papel. Mi por a mira kla kon e homber a dal un rosea grandi. E trabow tabata maestral.

E tipo a para ranka su faha un ratu, i keda weta e otro banda di kaja. Kasi mi por a roga pa e grips di tres banana.

El a kumpli ku mi deseo. Mes rapido i ku mes fasilidad el a horta di tres banana i tir'e den saku. Despwes el a keda para manera hende kens un ratu. I kompletamente kalmu el a hisa su saku, kamna bai den direkshon di Otrobanda.

‘Hasta mañana’, el a saluda e Venesolanu.

E historia aki tabata asina inkreibel, ku asina m'a jega kas, m'a pon'e riba papel.