Spiritu
‘Dindina, bai buska polis’, Pachi Feli a pidi su ju muhe. ‘Si mi mester sigui drumi bow di e ramada aki un anochi mas, romatisma ta matami’.
‘Papa ta kere ku e spiritu ta sali for di kushína ora e mira polis?’
‘Tur spiritu tin miedu di polis’, Pachi Feli a deklara.
Dindina a para skucha e boroto den e pidasitu kushína tras di nan kas. Botter tabata kai kibra. Tapadera di wea tabata zona. Dindina a sinti kon su pianan a kuminsa tembla di miedu.
‘Mi ta bai bini mesora’, el a bisa e biew. Bon nervioso el a mara su lensu na kabes i kore bai wárda di polis na Montanja. Pachi Feli a keda wak e, te ora el a disparse den skuridad.
Mein ora despwes Dindina a baha for di auto di polis i subi e pida seru kaminda nan kas ta pará.
‘Kon ta bai, Pachi?’ e polis a saluda e biew. ‘Ta kiko ta pasa? Tin spiritu den kushína?’
‘Teribel, mi shon’, Pachi Feli a kuminsa splika. ‘E kos aki ta molostia nos ja ta un siman kaba. Anochi mi n' por drumi. Pober Dindina ta keda lantá henter anochi den kamber. Mi shon por kore ku e spiritu?’
‘Mi ta hasi tur loke mi por’, e polis a priminti ku kara serio. ‘Ta unda e kushína ta?’
Dindina a munstra e polis, mientras e mes a para tembla di sustu. E polis a pasa den sala, bai patras, y habri e porta mankaron di kushína. Mesora tur boroto a stop.
‘Mi ju a mira’, Pachi Feli a kuminsa hari. ‘E showru a baha na awa’.
E polis a drenta den kushína i wak tur kaminda. Tabatin algun botter tirá na swela. E di: ‘Dindina, mi ta bai purba un be mas, pasobra mi no ta kere...... ‘Pero e polis no a finalisa su frase. El a sende un sigaria i sinta warda un ratu.
Djis despwes boroto a bolbe kuminsa den kushína. E polis a kohe su flashlight i kamna riba su punta di pia, bai na e porta di kushína. Asina el a dal e porta habri, el a tira lus tur kaminda. Tres djaka grandi a bula for di mesa i disparse tras di algun kaha bashi.
‘Mi shon a mir'e?’ Dindina a puntra e polis ora esaki a sali for di kushína.
‘Klaro’, e polis a kontestá. ‘Tabatin tres. Nan ta masha mahos. Pero aki poko dia tur tres ta disparse. Nan a spanta asina nan a mirami’.
‘M'a bisabo, Dindina’, Pachi Feli a bolbe tuma den. ‘Polis ta juda semper. Mi shon ta dal un kos pa kenta kurpa?’
‘No, pachi. Masha danki. Pero...... Dindina, tende un kos aki. Si manjan bo bai Punda, kumpra dos rateval grandi. Pasobra ademas di e spiritunan, tin algun djaka tambe den kushína’.
Auteursrechtelijk beschermd