Arte di palabra

22. Drama durante Renasementu

Influensha di Renasementu a bin kambia e drama medieval.

E ora ei nos ta bin haña e klasifikashon, sigun e tema tratá:

1.	tragedia
2.	komedia
3.	pastoral.

I sigun e fórma:

1.	drama klasiko
2.	drama romantiko.

Drama klásiko

1.	Semper drama klásiko tabata partí den sinku akto. Na final di kada akto (ku eksepshon di esun di sinku) tabatin un koro. (E koro aki tabata kanta e impreshon ku e presentashon a hasi riba e miradó ideal).
2.	Generalmente e material eséniko tabata mashá moderá.
3.	Unikamente persona di kargo elevá (rei, pader ets) tabata hunga aden.
4.	E drama klásiko tabata atene estriktamente na tres unidad: a. unidad di tempu b. unidad di lugá c. unidad di akshon.
	E unidad di tempu tabata eksigi ku e akshon mester a finalisa den 24 ora.
	E unidad di lugá tabata eksigi ku e drama mester a tuma lugá na un sitio so.
	E unidad di akshon tabata eksigi agrupashon di tur echo rondó di un idea prinsipal.

Ku transkurso di tempo nos ta mira ku e drama burgues ta drenta na luga di e drama klásiko. E ora ei no ta unikamente persona di kargo elevá ta tuma parti pero hende komun tambe.

Drama romantiko

Esaki ta muchu mas liber ku e drama klásiko. E no ta mará na e tres unidadnan; e no ta moderá den su material eseniko; e ta dirigi riba e miradónan i su kantidad di akto por varia, mientras e no tin koro.