Arte di palabra

16. Parábola, idilio, kwenta poetiko

Meskos ku un fábula, un parábola tin karakter didáktiko-épiko. E tema di dje no ta saká for di bida di bestia, pero di hende. Intenchon di un parábola ta pa mustra hende riba su deber ku Dios i ku su próhimo. Pa medio di un ehempel konkreto nos ta haña instrukshon religiose o moral. Biblia ta yen di parábola.

Idilio

Un idilio ta un kwenta den fórma di poesia o prosa, deskribiendo akontesimentu i sitwashon simpel i agradabel, manera nos por topa den bida di hendenan trankil i satisfecho den kunuku.

E mesun ideanan nos ta haña den Arkadia i Pastoral.

Un Arkadia ta un novela pastoril. Un Pastoral ta un novela pastoril dramatisá.

Arkadia ta un paisahe griego den Peloponeso. Su habitantenan tabata konosi pa nan bida puru. Poetanan a idealisa e parti ei i su habitantenan. Hopi eskritor a pone nan personahenan den e ambiente di Arkadia, e pais di inosensia i pas, pa hui realidad i biba den un naturalesa virgen.

Kwenta poetiko

E poeta ta konta un kwenta istóriko o di fantasia, den un idioma simpel, pa entretené su auditorio. E no ta trata ningun tema pisá o im-

[p. 19]

portante. Su uniko deseo ta di diberti esnan ku ta tend'e ku un kwenta interesante.

Epopeya (poema épiko)

Poema épiko ta e forma prinsipal di poesia epiko. E ta relata na un manera obhetivo un istoria poetiko di un gran akontesimentu. E kwenta ta detaya i e ta partí den un siertu kantidad di kanto. Klásikonan tabata konsidera epopeya e fórma prinsipal. Den un epopeya nan tabata duna alabansa na nan heroenan di antes.

Tin dos sorto di epopeya, esta epopeya popular i epopeya kultural. Un epopeya popular ta un poesia épiko ku a nase i krese den pueblo, kontando un echo grandioso di istoria nashonal. Algun ehempel ta: Beowulf, Ilias i Odisea.

Un epopeya kultural ta kreashon di un poeta konosi. Den e kaso aki e poeta ta proyekta i aregla e tema, hinkando su mes opinion aden. Un epopeya kultural por trata un tema nashonal, aunke no ta nesesario. Kwalke gran akontesimentu por ta tema pa un epopeya kultural.

Algun ehempel ta: La divina Commedia di Dante Alighieri.

Parcival.

Paradise lost.