Arte di palabra

[p. 17]

14. Mito, saga, leyenda

Mito

Esaki ta un istoria tokante bida i relashon di diosnan. E ta basá riba tradishon oral. Ta nifika ku e pueblonan pagano tin mito. Komo nos literatura ta kuminsa den siglo 17, nos no tin mito.

Papiando di mito, generalmente nos ta pensa riba Griegonan i Germanonan.

Ta posibel, naturalmente, pa kompone kwenta ku base di mitologia griego o germániko, loke por siertu varios owtor a hasi. Origen di mito dje pueblonan pagano lo mester tabata mas o menos asina aki: E hendenan tabata buska algu personal den loke ta sosode den naturalesa, mientras nan tabata pará impotente dilanti di e fenómenonan di naturalesa. I komo hende tabata konose únikamente su mes i bestia, el a imagin'e e ‘demoñonan’ igual na hende o bestia. Despwes el a atribui kwalidad, karakter i pashon humano na e ‘demoñonan’. Despwes el a pone nan huntu i laga nan produsi otro figura. A la largu e imaginashon di hende a forma henter un grupo grandi di dios grandi ku chiki.

Saga

Un saga tambe ta basá riba tradishon oral. Esaki ta un kwenta ku tin un fondo istóriko. Rondo dje fondo aki fantasia a krea sobrá detaye. Pero generalmente fantasia sa bira asina grandi ku no ta keda muchu kos dje base original. Aunke algu di istoria ta keda eksisti den e saga.

Leyenda

E palabra ‘leyenda’ ta derivá di esun na latin ‘legenda’, ke men loke mester ta lesá. Esaki ta nifika ku un leyenda ta basá riba tradishon skibí.

Un leyenda ta un kwenta relashona ku religion kristian. Generalmente e ta kontene un milagro.