Levenders reden-feest, oft Amsteldams Helicon

Op-ghestelt By de Brabantsche Reden-Rijcke vergaderingh uyt Levender Ionst

[fol. T2r]

Haerlem, De vvijngaert-ranck.

Knie-werck, Op de Vraghe: Wat vvijsheydt meest tot Lof de Reen-Vrou baren kan?

ALle wijsheyt is zotheyt dan 't gheen Godt ons geeft,
Vermidts den Mensche uyt sich selfs gantsch niet en heeft,
Doch natuer is van Godt gheschapen en ghebooren,
Haer meeste werckingh aert, en kracht is nae behooren
Dan kennisse zich selfs het welck men mercken can
Wt Plato die alsulcks met woorden wyset an,
Door zijn vernuft 's gelijcks meer ander buyten Goode,
Die sulcks door redens-kracht de dolle dolligheyt doode,
Want wijsheydt om de Ziel te zalighen ontspruyt
Door Godes gheest: maer merckt de reden die ontsluyt
Kennis van goet en quaedt om 't vleys te overwinnen
In haere lust, en stut de kracht der boose zinnen,
Dit's haeren hooghsten aert der wijshheydt: Heyl'ghe reen,
Ghy druckt de dertelheydt, en wercket ja en neen,
Ghy stelt den Mennsch gherust, ghy leert hem 'tquade haeten,
Ghy straft het onverstant, en regheert Prins en Staeten,
Ghy wercket Edelheydt, en stuert het hert tot deught,
En doet dat Landt en Volck gheniet beyd' vreed' en vreught,
Ghy baert ootmoedigheydt, en domt de quade zeden,
En werckt goet oordeel, want de Heydenen en deden
Gheen wercken prysens waert, dan die uyt reden sproot,
De reden heeft haer tot Godtvruchtigheydt ghenoot,
Doch 't meest de reden baert, en van haer wert ghegheven
Is kennisse zich self, 't gheen vromelijck doet leven.

Luyckt gheen Deught.