Levenders reden-feest, oft Amsteldams Helicon

Op-ghestelt By de Brabantsche Reden-Rijcke vergaderingh uyt Levender Ionst

[fol. A3r]

Vaersen Op de dry Verthooninghen vanden Heliconschen Bergh.

D'Eerste.

SIet 't volle Helicon in vreughd' op desen dagh
De Konstens Minnaers met haer lieve galmt ontmoeten,
Siet 't uwaerts is haer jonst gelijck sy altoos plagh,
Laet lust dan vloeyen recht om danckbaer te versoeten,
Siet haer sprinck-Ader straelt tot u met welcom groeten.

Tvveede.

'T Levender oeff'nend graeg', dat Wysen Raedt behoeft,

Versoeckt de Raedt en hulp, aen haer Ghesusters heden,
Tot eere van haer werck, dies zy niet langhe toeft,
Maer siet haer aen de voet des Berghs vrymoedigh treden,
Versoeckt der Musen cracht tot vloeying vande reden.

Derde.

Apollo die gheneyght is haer de hant te bien,

Weckt Caliope en Clio tot haerder zyden,
Om mede op dees Feest aendachtigh toe te sien
Wat yder Minnaers doent behoort, en sonder myden
Treckt selfs na boven, om Minerva nu ter tyden
Hier toe beweghend' op te maecken dat haer Gheest
Nu gunstigh neder daelt, want dees wy b'hoeven meest,
Dit sal 't Levender zijn een troost noch jonck en teder
Hart gheven stercken, en verlustend' wecken weder,
Een yeder zy ghebeen, om achting en ghehoor,
Waer op 't Levender treed u met haer jonste voor.

Bemint de Waerheyt.

I.S. Kolm.