Gheestelycken waeckenden staf der Jodsche Schaep-Herders

[p. 138]

[p. 139]

[p. 140]

X X X I I. Lof-sangh tereeren van den soeten Naeme Iesvs.

Op de wijse: Amis chacun a son debvoir &c.
Et vocatum est nomen ejus Iesus. Luca 2. cap.

1.

GEen naemen zijnder op der eird'
Sulck' eere weird,
Sulck' eere weird,
Als IESVS Naem',
Die alle naemen gaet te boven;
Laet ons eersaem,
Laet ons eersaem,
Dien hooghsten Naem.
Den soetsten Naem
Van IESVS loven;
Want IESVS eyghen wordt gheseyt,
Want IESVS eyghen wordt gheseyt,
De saligheyt.

2.

Den naeme van Emmanuel

Betaemde wel,
Betaemde wel,
Maer al veel meer
Den Naem van IESVS hem ghegheven;
Laet ons den Heer,
Laet ons den Heer
Bewijsen eer',
Wiens Naeme IESVS wordt gheschreven;
Heer IESVS eyghen is gheseyt,
Heer IESVS eyghen is gheseyt,
De saligheyt.

3.

Een olye ghegoten uyt,

Naemt hem de Bruydt,

[p. 141]

 

Naemt hem de Bruydt,

 

En 'tis daer om,

 

Dat hem de dochterkens beminnen;

 

O Bruydegom !

 

O Bruydegom !

 

O Jesse-blom !

 

Kom (IESV) vloeyt in onse sinnen;

 

Want ghy zijt eyghentlijck gheseyt,

 

Want ghy zijt eyghentlijck gheseyt,

 

De saligheyt.

 

4.

 

Adonaî hiet hy andermael,

 

In Jodsche tael,

 

In Jodsche tael,

 

Men was bevreest

 

Den naem Iehova te vermonden;

 

Door Godes Gheest,

 

Door Godes Gheest,

 

Voor minst en meest

 

Is IESVS Naem ons af-ghesonden;

 

Want IESVS eyghen is gheseyt,

 

Want IESVS eyghen is gheseyt,

 

De saligheyt.

 

5.

 

Den Naem van IESVS is soo soet,

 

Dat sy ons voedt,

 

Dat sy ons voedt

 

In waere deught,

 

En weet ghesontheyt by te bringhen;

 

Laet ons verheught,

 

Laet ons verheught,

 

Met volle vreught

 

Den Lof van IESVS Naeme singhen:

 

Want IESVS eyghen is gheseyt,

 

Want IESVS eyghen is gheseyt,

 

De saligheyt.

[p. 142]

 

6.

 

Heer IESVS Naem te boven gaet

 

Den honigh-raet,

 

Den honigh-raet,

 

In leckerheyt,

 

Die Godes wtverkoren smaken;

 

In IESVS leyt

 

In IESVS leyt

 

De soetigheyt,

 

Die kan alleen' de ziel vermaken:

 

Want IESVS eyghen is gheseyt,

 

Want IESVS eyghen is gheseyt,

 

De saligheyt.

 

7.

 

Laet ons wt al ons herte grondt

 

De wereldt rondt,

 

De wereldt rondt,

 

Met bly ghemoet

 

Den Naem' van IESVS vry belijden;

 

 

 

[p. 143]

 

Met vleesch en bloedt,

 

Met vleesch en bloedt,

 

En al ons goedt,

 

Laet ons voor IESVS Naeme strijden.

 

Want IESVS eyghen is gheseyt,

 

Want IESVS eyghen is gheseyt,.

 

De saligheyt.

 

8.

 

Dat IESVS Naem' ghebenedijdt

 

Tot allen tijdt,

 

Tot allen tijdt,

 

Aen't gulde raem

 

Gheschildert zy van yder ziele;

 

O IESVS Naem !

 

O IESVS Naem !

 

Maeckt my bequaem,

 

Dat ick van uwe Liefde kriele;

 

En gheeft my als mijn ziele scheydt,

 

En gheeft my als mijn ziele scheydt,

 

De saligheyt.