|
| |
HIER NAER VOLGHEN DE schoone Gheestelijcke Refereynen.
Refereyn vanden houwelijcken staet.
GHeluckich en Salich is die partuere,
Wiens Houwelijck begint inde vreese Godts puere,
Als Abraham en Sara by een zijn versaemt,
Maer die daer versamen als beesten stuere,
Alleen om te blusschen haer vleesch en natuere,
Ouer dese heeft macht den duyuel genaemt,
Die de seuen mans van Sara ter doot heeft gepraemt,
Als int boeck Tobie ons staet gheschreuen,
Heer bruydegom, vrou bruyt dit v niet en betaemt,
Als Isaack en Rebecka wilt nae Godts wet leuen,
Siet wat exempel v Tobias sal gheven,
Dat den Enghel Raphael hem heeft gheleert,
Eer dat ghy sult v bruyt wt liefden aencleuen,
Tot waecken en ghebeden v eerstmaels keert,
Dan sal Godt door v geslachte worden ghe-eert,
Ghelijckmen van verscheyden inden Beybel beuint,
Salich ist houwelijck dat met Godt begint.
Aensiet hoe Tobias en Sara begonden,
Den houwelijcken staet in Godts vreese bestonden,
Sy hebben salige kinderen gheprocre-eert,
Oock Jacob en Rachel na Schrifturens oorconden,
| |
| |
Helcana en Anna hebben gratie gheuonden,
En Samuel den Prophete gegenereert,
Dus Heer Bruydegom, vrou bruyt, ist dat ghy begeert,
Dat Godts benedictie aen v sal beclijuen?
Siet dat ghy in Godts vreese perseuereert,
Soo sult ghy vruchtbaer zijn na Dauids schryuen,
V kinderen sullen staen als planten van Olijuen,
Ghedienstich aen v tafel tot uwer baet,
En ist niet liefelijck voor mannen en wijuen,
Die alsoo leuen inden houwelijcken staet?
Tis een eerts Paradijs vol weelden delicaet,
Daermen hier namaels het eeuwich leuen me wint,
Salich ist houwelijck dat met Godt begint.
Ist dat v houwelijck in Godts vreese geschiet,
In al v hanteringe na des Heeren bediet,
Sult ghy geluckich en voorspoedich wesen,
Godts benedictie sal v vergeten niet,
Ghelijckmen dagelijckx gebeuren siet,
Al die wandelen in Godts wet gepresen,
Heer Bruydegom, vrou bruyt, siet dat ghy desen,
Houwelijcken staet onderhout, soo Paulus vermelt,
Want hy is een groot Sacrament wtgelesen,
Van Godt int aertsch Paradijs ingestelt,
Ghy die met den bant der liefden by een zyt gewelt,
Nu een geworden zyt onder v beyden,
Ghelijck den Apostel Matheus vertelt,
Gheen mensche ter Werelt en mach v scheyden,
Begheerdy een vreetsamich leuen te leyden,
Blijft inde liefde die alle dinck verwint,
Salich ist houwelijck dat met Godt begint.
Men leest inden eersten brief tot den Corinthen claer,
Oock totten Ephesien staet openbaer,
Hoe datmen het houwelijck sal onderhouwen,
Die Vrouwe sal lief hebben haren man voorwaer,
Hem onderdanich zijn als Heere eerbaer,
Om dat den man is het hooft der vrouwen,
Den man sal oock liefhebben sonder vercouwen,
Sijn eygen huysvrouwe en anders gheene,
Gelijck Christus bemint heeft soomen mach aenschouwen,
Sijn Heylige Kercke haer makende reene,
| |
| |
Alsoo seyt Paulus sal den man certeene,
Sijn Huysvrouwe beminnen wt caritaten,
Want ghy twee nu gheworden zijt eene,
Door dat Sacrament des Houwelijcx groot bouen maten,
Daerom sal een mensche vader en moeder verlaten,
Met een geduerige liefde malcanderen bemint,
Salich ist houwelijck dat met Godt begint.
| |
Prince.
Heer Bruydegom en Vrou bruyt hier aen sult ghy leeren,
Op dat v versaminge sy tot Godts eeren,
Gelijck als kinderen der heyligen na Tobias vermaen,
Dan sal Jesus v gast zijn den Heer der Heeren,
Hy sal v water in wijn verkeeren,
Ghelijck hy in Cana Galileen heeft ghedaen,
Alsmen vint Joannes int tweede geschreuen staen,
Daer geschieden die Bruyloft na Godts behagen,
Begeerdy oock blijschap voor druck te onstaen,
Hebt Godt voor oogen alle v daghen,
Twist en tweedrachticheyt wilt van v veriagen,
Soo sal Godt in v blijuen, en ghy in Godt,
Hy sal gestadich sorge voor v dragen,
Ist dat ghy leeft nae zijn heylich ghebot,
Somma ten lesten dit is het slot,
Van desen sluyt-regel dit wel versint,
Salich ist houwelijck dat met Godt begint.
|
|
Auteursrechtvrij