Een nieu devoot geestelijck lietboeck

Een nieu gheestelijck Leysliedeken, op de wijse: Fit porta Christi peruia.

ONs is een Kint gheboren fris,
Hem eeren wy met melody,
Den soon die ons ghegeuen is,
Looft hem met herten bly,
Want hy sal ons maken vry,
Van des duyuels tijranny.
Daerom is hy ghecomen hier,
Dus looft den Heer, met herten seer,
Die voor ons is soo goedertier,
Tot hem neemt uwen keer,
Gheeft hem lof hoocheyt en eer,
Desen ionghen Coninck teer,
Hy is ons salichmaker goedt,
Dus weest verblijdt wie dat ghy zijt,
Ons Coninck en ons leytsman zoet,
Looft hem tot alder tijt,
Met lofsanck vreucht en Jolijt,
Desen soon ghebenedijt.
Hy sal regneren eeuwelijck,
Aenbidt hem al int aertsche dal,
In Jacobs huys in Dauidts rijck,
Looft hem met bly gheschal,
Die ons vanden grooten val,
Wederom oprichten sal,
Van die toecomende werelt claer
Is hy certeyn een Vader reyn,
Een Prins des vreeds is hy voorwaer,
Dus looft hem al ghemeyn,
Met lofsanck int aertsche pleyn,
Onsen Godt is hy alleyn.

[p. 22]

 

Seer wonderlijck is zijnen naem,

 

Dus looft hem snel met Hemels spel,

 

Een stercke Godt is hy bequaem,

 

Leytsman van Israhel,

 

Laet ons doen na zijn beuel,

 

Want hy is Emanuel.

 

Eeuwich wort nv zijn eer verclaert,

 

Met loff en prijs den Coninck wijs,

 

Die ons een maghet heeft ghebaert,

 

Looft hem nae mijns aduijs,

 

Want hy is een soet spijs,

 

Voor die zielen seer propijs.