Een nieu devoot geestelijck lietboeck
(1605)–Nicolaes Janssens–
Auteursrechtvrij
[pagina 13]
| |
Met vreucht tot uwer eeren,
Lofsanghen singhen wy,
Om v lof te vermeeren,
Hier op der aerden vry,
Weest ghegroet Maghet vry,
Schoon lelie puere,
Godts lieue Moeder goet,
In ons leste ure,
Neemt ons in v behoet,
Ghy zijt alleen een moeder,
Van Godt seer hooch gheacht,
Verlosser en behoeder,
Vant menschelijck gheslacht,
Den sone Godts ons broeder,
Die hebt ghy voort gebracht. Weest gegroet, etc.
In v suyuer lichame,
Soo is hy neer ghedaelt,
Den sone Godts eersame,
Die ons schult heeft betaelt,
Hier toe waert ghy bequaeme,
Vanden gheest Godts doorstraelt, Weest.
Wy groeten v met sanghen,
In dese hooghe feest,
Om dat ghy hebt ontfanghen,
Vanden heylighen Gheest,
Hem daer wy met verlanghen,
Naer haecken aldermeest, Weest.
Met vreucht hebt ghy ghedragen
Uwen sone vermaert
Sonder droefheyt of claghen
Soo hebt ghy hem ghebaert
Dus wordt tot allen daghen
V lof en eer verclaert. Weest.
Voor het baren verheuen
Waert ghy een maecht eerbaer
Ghy zijt oock maecht ghebleuen
Naer het baren voorwaer
Ghelijck het was gheschreuen
Door Esaiam claer. Weest.
Van Godt waert ghy te voren
| |
[pagina 14]
| |
Verciert met alle deucht
O Maghet wtvercoren
Hoe seer waert ghy verheucht
Doen van v was gheboren
V soon met groote vreucht. Weest.
Als dese uwen Jonghen
Sone, gheboren was
Lofsanck wart daer ghesonghen
Tot Betlehem op dat pas
Van die Enghelsche tonghen
Die hem aenbaden ras. Weest.
Met grooter vrolijckheden
Knielden ghy op dat pleyn
Ghy hebt hem aenghebeden
Vwen Sone certeyn
Ghedeckt zijn teere leden
Met witte doecken reyn. Weest.
Certeyn met grooter weerden
Danckten ghy Godt den Heer
Ghy naemt hem vander eerden
V Jonghe sone teer
Hy was die ghy begheerden
Ende oock beminde seer. Weest.
Denckt hoe ghy v verheuchde
Van dese blijschap groot
Als die fonteyn van deuchden
Daer lach op uwen schoot
En ghy custen met vreuchden
Sijn soet mondeken root. Weest.
Dus zijn wy met v blye
Wy asschen, eerdt en stof
Om dat nu die partije
Borghers vant hemels hof
Singhen met melodije
Godt inden hoochsten lof. Weest.
Och met wat soete ooghen
Aensaecht ghy hem altijt
Godt Coninck vanden hooghen
V soon ghebenedijt
Die hebt ghy moeten sooghen
| |
[pagina 15]
| |
Op voeden met iolijt. Weest.
Ghy zijt die vrou warachtich
Die Maghet excellent
Die door v saet warachtich
Verplet hebt dat serpent
Dus eeren v eendrachtich
Alle gheslachten ient. Weest.
Eere wy v bethoonen
Onse Princersse wijs
Want eeuwich sult ghy woonen
Int Hemels Paradijs
Hierom alle persoonen
Gheuen v lof en prijs.
Weest ghegroet Maghet soet etc.
|
|