Om tot die eeuwighe salicheyt te comen.
DEuchtsame beminde vrienden N.D. Onse lieve Heer die seyt inden H.Euangelio, vvat soude een mensch baten dat hy alle die Werelt vvon, ende dat hy zyn Ziele verloor, oft vvat soude een mensch moghen geven in vvisseling van zijn Ziel: Nademael dan dat vvy niet costelijcker en hebben dan die Siel, soo laet ons voor alle vverck altijt onse zielen salichheyt besorghen. Van vvelck het fondament is een vast gheloof, vvant sonder gheloof ist onmoghelijck Godt te behaghen, al leefdy oock alsoo vvel als sint Ian Baptist. Want die niet en ghelooft die is verdoemt.
Ten tweeden soo moetmen die gheboden Godts onderhouden, so onse Heer seyt, vvildy tot den leven ingaen, soo onderhout die gheboden. 'Twelck is datmen Godt moet boven al lief hebben, datter is in Hemel ende in Aerden, ende meer dan ons eygen leven, ende ons eue mensch sullen vvy ghelijck ende recht doen, ende barmherticheyt bewijsen, als vvy vvilden dat ons selfs gheschiede. En als vvy dan al ghedaen hebben dat vvy moghen doen, soo sullen vvy bekennen dat vvy onnutte knechten zijn. Ende vvy sullen ons altemael verlaten op die verdienste Christi Iesu, op die cracht van zijn H.leven en sterven. Dit doende so sullen vvy voor seker tot die eeuwighe salicheyt comen. 'Twelck ons Godt gunnen vvil, den vvelcken ick v l. altesamen bevele, in zijn Godtlijcke genade. Geschreven in Haerlem desen ij. October. Anno 1587.
Al uwen goet gunstighen vrient N.
Auteursrechtvrij