Om ghesontheyt te onderhouden.
BEminde Kinderen B.H. vvant ick beminne v ghesontheyt, en begeer v langhe leven. Soo schrijf ick al hier int corte, hoe ghy in goeder ghesontheyt sult leven. Twelck sal gheschien ist dat ghy schout ouerdaet van spijs en dranc ende oock verstoornissen en droefheyden, vvant dees verteeren vleys ende bloet, en zijn principael vyanden vande ghesontheydt. Ende contrarie ist seer goet dat een mensch goede, diet hout in spijs en dranck: en dat hy schick vrolijck ende vreetsamich te leuen. Men siet daghelijcx dat blygheestighe, vrolijcke ende vrymoedighe menschen zijn altijdt vet, gesont, en van schoone coleure. Ende inbindende menschen zijn ghestadich bedruckt, benaut, truerich, sieck ende melancolijck: Item Campangen is een onvruchtbaer lant, en daerom soo moeten die luyden daer te lande veel arbeyden, en zijn sober van spijt en dranck, vvaerom zy seer oude luyden worden. Tot onderhoudinghe van u ghesontheydt schout alle verstoornissen des herten, ende houdt een vrolijck ghemoet, ende ghebruyckt maticheyt in spijs en in dranck. Hout u vvarm, ende oeffent v in arbeyt, ende hout goede rust, ghy sult leven soo lang alst u lust.
Auteursrechtvrij