Aen de ghehouden.
DEuchtsame beminde vrienden N.N. Godt den Heer verleen u al t'samen veel ghelucx inde houwelijcke staet.
Naedemael ghy nu deur den bant ende het Sacrament der houweling twee in een vveys ghebonden zijt, soo dat v niemant en behoort te scheyden dan die Doot. Soo is mijn begeeren op v dat ghy een vroom Christelijck leven vvilt leyden, als betaemt de vvtvercoren kinderen Gods, en vvort teelsters van Hemelsche burgers, vvaer toe den houwelijcken staet inden Paradijs van Godt den Heer inghestelt is, en heeftse vvederom vernieut ende vereent inde bruyloft van Cana Galilea, daer die Heer zijn eerste mirakel ghedaen heeft, ende heeft verandert vvater in vvijn, 'twelck daghelicx Godt den Heer noch laet gheschien, so vvanneer als hy de lasten der ghehouden verlicht, ende haer zijn gratie is verleenende. Daerom soo sullen man en vvijf malcander beminnen, helpende malcander die lasten draghen, ende sullen vreedtsamich leven, haer kinderen sullense inde vreese Gods opbrenghen, en sullen haer huysghesin een goet exempel gheven van leven. Die man sal buytens huys toesien, en die vrou binnens huys. Die man sal winnen, die vrou salt te rade houden. En salt gaen te recht, soo moet die vrou vvesen 'tIonck-wijf, en die man die knecht, te vveten int toesien.
Auteursrechtvrij