Een goet kint danckt zijn ouders.
Laus Deo semper, in Haerlem.
BEminde Vader N. Ick ontbiede u hondert duysent goede nachten, en laet v vveten dat ick noch cloeck ende gesondt ben, Godt heb lof, soo als ick verhoope dat ick v l. mede vinden sal als ick te Kermis thuys come, daer ick u seer af bedancke dat ghy v ghewaerdicht hebt my te ontbieden. Ick beginne rechtevoort al die daghen te tellen ende doe te meer neersticheyt om met eeren thuys te comen, ende niet beschaemt te vvorden. Beminde Vader, ick ben seer bedroeft, om dat ghy my soo ontallicke veel vveldaden ghedaen hebt, mijn voedende ende onderhoudende in cost en cleeren, en soo veel schoone vermaninghe doende, dat ick niet met allen en heb om eenighe danckbaerheydt te toonen. Maer ick hope dat my Godt die Heer noch gratie sal verleenen dat ick betoonen sal metter daet dat ghy gheen verlooren costen noch moeyten noch vermaninghen aen my ghedaen hebt. Ick hope v l. noch groote bystant te doen in v affairen met Godt gratie alst vvel reden is. Want een boom en brengt gheen vruchten voort voor haer selven, maer voor een ander. Soo mede beminde Vader hoop ick dat mijn neersticheyt ende leeringhe v l. sullen te passe comen belieftet Godt den Heer, die ick u bevele met al onse goede vrienden. Gheschreven in Haerlem den xvj. Sept. Anno 1588.
V onderdanighe Sone.
Aen den eersame Lywatier N.N. mijn beminde Vader, Tot Haerlem.
Auteursrechtvrij