Oeuvres complètes. Tome VI. Correspondance 1666-1669

N^o 1769.
C. Perrault¹⁾ à Christiaan Huygens.
28 octobre 1669.

La lettrese trouve à Leiden, coll. Huygens.

Monsieur

La pensée que vous m'auez faict auoir d'adjuster vne horloge a ma fontaine, a toujours roullé dans mon esprit depuis vostre depart²⁾, Aussy plus J'yay songé plus J'ay trouué de disposition sur le lieu pour le faire. J'ay de leau suffisament, et de la pente plus qu'il ne fault, sans rien perdre de la hauteur du Jet de mon parterre.

1) Claude Perrault, né en 1613 à Paris, où il mourut le 9 octobre 1688. D'abord médecin, il fut chargé par Colbert de traduire Vitruve, et en conséquence il se consacra à l'architecture. Lorsque, en 1665, il y eut un concours d'architectes pour la façade du Louvre, et que le chevalier Bernini dut se retirer et rentrer en Italie, ce fut à Perrault que la construction de cet édifice fut consiée; ce fut lui aussi qui bâtit l'observatoire, sans employer ni bois, ni fer.

2) Chr. Huygens avait passé quelque temps chez Perrault, à Viry, et était parti de là entre le 8 et le 17 octobre 1669.

[p. 507]

Ma grotte ou J'ay dessein de la mettre en receura beaucoup d'ornement, Et ce sera asseurement vne grande commodité d'auoir vne horloge qui ne soit point sujette aux soins qu'il fault auoir pour les autres. En fin suiuant vostre aduis, Jay resolu de faire vne pendule, Je veux dire de celles de vostre premiere invention qui ont leurs vibrations alternatiues & reglées, et non pas de celles qui tournent alentour dun Pivot que vous auez jnuentees et faict executer depuis peu auec tant d'aprobation & d'agrement. Car quoy que J'eusse peut estre trouué plus de facilité en cellecy, ce que Ie croye que la justesse est en lune comme en lautre J'ay pensé pourtant que la premiere connuiendroit mieux a mon dessein, pour ce que cette grande mobilité qui est requise a cette derniere, seroit difficile a donner et a conseruer en vn lieu qui aparemment sera humide comme celluy ou Je le veux placer et ou la moindre rouille ou saleté qui s'attacheroit a lendroit ou tourne le piuot seroit capable de l'arrester, ou du moins d'alterer beaucoup son mouuement. D'abord mon dessein estoit de faire mouuoir la Pendule auec de leau comme auec vn contrepoids par le moyen d'une roüe a godetz, mais vous scauez les jnegalitez qui se trouuent dans les mouuemens a plusieurs roües Et que vous n'auez jnuenté la pendule que pour y apporter quelque remede. Et quoy que les Cicloydes que vous y auez depuis adjoustées semblent y auoir donne la derniere justesse Je me suis pourtant toujours jmaginé que sy lhorloge pouuoit nauoir dautre cause de son mouuement que la pendule jmmediatement et jndependament jl y auoit lieu d'estre asseuré de sa justesse. Ce raisonnement me sembloit assez bon mais la difficulté estoit dexecuter ma pensée, et de trouuer comment vne eau dont le mouuement est toujours d'une mesme sorte, pourroit faire mouuoir vne pendule dont le mouuement est changeant par ses allées et venues alternatiues. La roüe de rencontre me leuoit bien cette dificulté, en y attachant vne roüe a godez dont Jay parlé, mais je ne voulois pas m'en seruir me deffiant de jnegalitez a quoy Je la tiens sujette a cause de la difficulté qu'il y a degaler ses dens dont la justesse doibt estre extresme et de trouuer la veritable situation de son balancier ou palettes Et encore plus acause que leau intrant et sortant des godets rendroit le Contrepoids jnegal. Et puis Je ne satisfaisois pas par la mon desir puisque mon jntention estoit de donner le mouuement a mon horloge jmmediatement auec la pendule. Enfin apres y auoir assez pensé, Je croy auoir trouué ce que Je cherchois, et pour en estre plus assuré J'en ay faict vn modelle lequel je vous feray voir quand Je seray de retour. J'ay faict plus car J'ay trouué le moyen par lequel cette pendule s'estant arrestée soit acause que leau de la fontaine auroit cessé de couler, ou autrement, pourra se mettre en train daller d'elle mesme, la mesme eau y retournant sans autre augmentation ou changement, Ce qui m'a satisfaict assez pource que encor que ma fontaine coule toujours, et que Je prenne leau au sortir de sa source ou jl ne peut arriuer de ces jntermissions comme aux fontaines qui viennent par des tuyaux sujets a plusieurs jnconueniens, neanmoins Je vous auoüe qu'ayant toujours consideré cette jmmobilite de la pendule et cette necessité de l'exiter a se mouuoir comme

[p. 508]

vn deffault, Jay esté bien aise de trouuer ce remede qui sera bon pour les autres fontaines qui n'ont pas lauantage qu'a la mienne. J'ay pareillement adjousté cela à mon modelle qui reussit fort bien, cependant par aduance Je vous enuoye vn crayon²⁾ de toute la machine et de ses parties dont Je vous veux expliquer lusage le mieux que Je pourray.

A est vn bacquet de la profondeur denuiron vn pied, et d'une Capacité a discretion dans lequel toute leau de ma fontaine se vient rendre. Il a par le costé et proche du fondz vne ouuerture a laquelle est soudé vn tuyau de vii ou viii lignes de diametre ouuert par son extremité B. de deux lignes ou enuiron, se courbant en bas pour donner son eau a plomb et laquelle est destinée a la pendule, le surplus de leau sescoule par vne autre large ouuerture qui est au hault du baquet A marquée X. et par ce moyen ledict bacquet demeurant toujours plein jusques a cette ouuerture donne toujours vne pareille quantité deau au tuyau B.

D I. est vn autre bacquet de la longueur de dix poulces ou enuiron, large d'un poulce seulement, de 4 ou 5 lignes de profondeur sur ses deux extremitez, reuenant a trois poulces par le milieu en pointe, auquel milieu est vne separation M qui tombe perpendiculairement du hault de cette pointe sur le fonds dudict bacquet quelle separe en deux partjes egales et en telle sorte que l'une n'a aucune communication auec l'autre. Les deux extremitez D.I. sont fermées comme les costez vn peu en rond et au milieu de chacun bout jl y a vne ouuerture de 2. a 3. lignes de large depuis le hault jusque au fonds dudict bacquet. Ce bacquet exposé et attachê sur lextremité d'un arbre ou piuot de fer ou acier marqué L. de forme triangulaire de la longueur de cinq a six poulces et de lespesseur de 4. a 5. lignes par le plus fort dont vn des costez est beaucoup plus estroit que les deux autres a peu pres comme seroit vn coin sur lequel costé etroit ledict bacquet D.I. est attaché, justement a lendroit et au dessous de la separation M en equilibre comme le fleau d'vne balance.

F.G. est vn autre bacquet de la longueur cy dessus, vn peu plus large et plus profond, posé justement au dessoubs du susdict, sur vn costé duquel et au milieu est attaché vne piece de Cuiue marquée N. creusée en angle fort ouuert; dans lequel angle est posé le bout dudict arbre triangulaire L sur son tranchant, affin que le bacquet D.I. qui y est attaché puisse se mouuoir auec facilité, lautre bout dudict arbre est soustenu par vne semblable piece de Cuiure O. a lopposite de N. orisontalement et a mesme Piuot ou arbre ou essieu est encore attaché au dela dudict bacquet F. G. la fourchette P. de la longueur requise pour entretenir le mouuement de la pendule, a laquelle Je donne trois pieds huit lignes de longueur ou enuiron affin que chaque vibration marque vne seconde. Et laquelle il fault conceuoir attachée par en hault auec vn fil ou soye alordinaire, ayant au bas son poids en forme dancre de nauire auquel Je donne deux liures de pesanteur. Ces pieces ainsy dispo-

2) Voir la sigure vis-à-vis de cette page.

[p. *23]

[p. 509]

sées voicy quel est leur usage & l'effect quelles produisent. Leau qui entre en abondance dans le bacquet A l'a bientot remply pour ce que celle qui sescoule par l'ouuerture du tuyau B nest pas considerable a legard du reste qui s'en va par louuerture den hault X. Celle donc qui passe par l'ouuerture ou tuyau B. tumbe aplomb dans le bacquet D.I. sur le hault de la separation M. laquelle eau remplissant les deux costez dudict bacquet D.I. sort par les ouuertures de ses deux bouts et tumbe dans le bacquet de dessous. Et tant que la pendule est jmmobile leau coule toujours de cette sorte sans aucun effect. Mais sy lon la faict mouuoir en la tirant vers V. alors la verge de fer de ladicte pendule faisant mouuoir auec elle la fourchette P. fera pareillement mouuoir le bacquet D.I. pose sur lessieu N.O. a qui ladicte fourchette est attachée fermement, et fera baisser le costé D. vers F. et leuer le costé I. vers S. En mesme temps le hault de la separation M. se mouuant auec tout le dict bacquet penchera aussy vers D. et donnera lieu a leau qui auparauant tomboit dans toutes lesdictes deux parties egalement de tumber seulement dans la partye I. au pied de ladicte separation ou elle sarreste jusques a ce que la pendule reuenant de V. vers T. fasse leuer le costé D. et baisser le coste I. et par consequant pencher le hault de la separation M vers S. donnant pareillement lieu a leau de tomber dans la partye D. au pied de ladicte separation M. Ce balancement dudict bacquet et ce penchement alternatif de la dicte separation M. a deux effectz considerables. Le premier est quil partage egalement dans les deux partjes dudict bacquet par le moyen de la pendule dont les vibrations sont egales, leau qui tombe aplomb du tuyau B. sans en perdre vne seule goutte jnutilement, L'autre est que l'eau ainsy partagée jmprime par sa pesanteur vn mouuement toujours egal, a la pendule, ce qui se faict en deux manieres, la premiere est que lorsque la separation M. se penche d'un costé, toute l'eau venant a tomber aplomb dessus le costé de ladicte separation qu'elle trouue jncliné pousse par sa pesanteur ladicte separation en la frottant, et donne ainsy du mouuement a la pendule quelle luy communique par la fourchette P. ce qu'elle faict pareillement quant elle se penche de l'autre costé. L'autre maniere est que l'eau qui estoit tombée dans le costé I. pendant que le coste D. se baissoit et ce qui estoit arrestée au pied de ladicte separation M. descend tout d'un coup & coule auec vistesse dans l'extremité de la partie I. lors qu'elle se baisse vers G. ou trouuant les bords de ladicte extremité, elle y est quelque temps arrestée, car louuerture qui y est estant petite, ne la laisse sortir que peu a peu, et pendant quelle est la amassée et arrestée, en attendant quelle sorte toute, elle pese, estant esloignée de son centre qui est le pied de la separation M. laquelle pesanteur pousse la fourchette P. contre la verge de la pendule et luy jmprime son mouuement. Pendant que cela se faict ainsy du costé I. la partye D. est eleuée auec facilité pour ce que l'eau qui y estoit sest ecoulée, et sitost que la separation M. penche vers I. l'eau entre dans la partie D. tombant au pied de ladicte separation ou elle s'amasse et y est pareillement retenüe par les bords dudict bacquet qui sont eleuez en pointe en cet endroit, au quel lieu comme en son centre elle n'a aucun

[p. 510]

poids qui puisse empescher celluy de leau qui est de l'autre costé. Et arriuant vne autre vibration, elle tombe dans l'extremité de la Partye D. ou elle cause le mesme effect que dans la partie I. Cette eau ainsy partagee roulant alternatiuement vers les bords dudict bacquet donne vne jmpression a la pendule tantost a droite tantost a gauche qui entretient son mouuement auec grande egalité puisque l'eau dont la pesanteur est la cause est toujours egale.

Voila de quelle facon Je fais mouuoir la pendule. Il fault maintenant vous expliquer comment la pendule prend son mouuement d'elle mesme l'eau y retournant. Il y a au bout du bacquet F.G. deuers F. vn autre bacquet E. dune capacité conuenable, seruant de closture par cet endroit au bacquet F.G. eleué enuiron vn poulce plus hault que le bout du bacquet D.I. quand jlest en equilibre et quand la pendule est en repos. Le costé du bacquet E qui est deuers D. est tout proche de D. en sorte qu'il n'y a de distance que ce qu'il en fault pour le mouuement dudict bacquet D.I. et comme le bout D. est rond jl fault que lendroit dudict bacquet E. qui en est proche, soit arondy en dedans pour contenir la figure dudict bout D. Il fault aussi qu'il y ayt vne ouuerture audict bacquet vis a vis de celle qui est au bout D. vn peu plus large, et que le tout soit si justement accommodé l'un a legard de l'autre quil semble n'estre qu'une mesme chose pourueu que la facilité du mouuement y soit toute entiere. Dans ledict bacquet E. jl y a vn sciphon prenant leau du fonds et lesleuant jusques au dessous de l'ouuerture qui est vers D. Le bout duquel sciphon sort dudict bacquet et sestend vers H. au dessoubs et a costé du bacquet F.G. enuiron 8 ou 10 lignes. Vis a vis de la verge de la pendule est vn tourillon tournant sur ses deux essieux, auquel est attache vne verge de fer descendant aplomb jusque proche le poidz de la pendule ayant au bout vn crochet pour pousser ladicte verge vers V. quand besoin sera. Au dessus de ladicte verge a crochet sur le mesme tourillon vn peu vers la costé du bacquet E. est entée vne petite palette de la longueur de deux poulces et de la largeur d'un poulce. Et a ce tourillon est attaché vne chaisnette vers R. auec vn contrepoids suffisant pour le faire tourner vers V. et sa verge a crochet vers T. jusques a son arrest quand jl sera besoin, joignant et a coste dudict tourillon jl y en a vn autre plus long que le precedent, ayant enuiron quatre poulces de longueur, sur lequel tourillon vis a vis de ladicte palette est enté vne petite piece que J'appelle vn pied de bische qui ne se peut plier dun costé, et de l'autre se courbe facilemeut et reuient jncontinant en son premier estat, Ce pied de biche est posé en sorte quil puisse poser sur ladicte palette lors que son tourillon sera meu, Et vn peu en deça est atachee vne piece de fer qui trauerse ledict tourillon, au bout de laquelle est attaché vne autre chaisnette auec vn contrepoids suffisant vers Π et a l'autre bout vn bacquet de grandeur suffisante Γ. lequel bacquet estant vuide est eleué par ledict contrepoids jusques en H ou jl recoit le bout du sciphon H. Ce qu'estant ainsy disposé voicy ce qui arriue. L'eau qui descend a plomb par le tuyau B. sur le hault de la separation M. est diuisée egalement dans les deux parties du bacquet D.I. qui est en equilibre et lesdictes deux partjes au-

[p. 511]

tant eleuées l'une que l'autre, leau qui tombe dans la partye D. sortant par son ouuerture D. entre dans le bacquet E. par vne pareille ouuerture que Je vous y faict remarquer tout joignant a la susdicte, et emplit ledict bacquet. Et quand l'eau est montée jusques au hault du sciphon lequel doibt estre d'un calibre proportionné a l'eau qui y entre, ledict sciphon la faict sortir par H. et la met dans le bacquet Γ. lequel en ayant receu assez pour emporter son contrepoids se baisse & faict tourner son tourillon vers Γ ou ledict bacquet est attaché, Et alors le pied de biche apuye sur la palette du petit tourillon et la faict baisser, faisant tourner vn peu ledict petit tourillon, et en mesme temps sa verge a crochet prend la verge de la pendule quelle pousse doucement vers V. jusques a ce que le pied de biche apuyant toujours sur la palette de plus en plus a cause de l'eau qui continue a couler toujours dans ledict bacquet, vient enfin a la quitter et ledict bacquet a tomber en bas, vuidant l'eau dont jl estoit remply, alors la palette n'estant plus pressée par le pied de biche qui l'a quittée, remonte en sa place par le moyen de son contrepoids R, Et la verge a crochet pareillement retourne auec vistesse vers T. doù elle estoit partje, et y demeure sans reuenir aussy a cause de son contrepoids laissant aller et reuenir la pendule quelle auoit esleuée, dans sa liberté, vers T. et V. dans lequel mouuement elle est entretenüe par celluy du bacquet D.I. ainsy que Jay dict. Cependant ledict bacquet Γ. qui estoit tombé en bas et qui auoit vuidé son eau remonté a cause de son contrepoids, et le pied de biche qui rencontre la palette du petit tourillon se plie pour remonter et se remettre dessus et en estat de recommancer vne autre fois. Jl fault remarquer qu'estant difficile de trouuer au juste la quantité d'eau qu'il faudroit qui entrast dans le bacquet E et de celle qui en doibt sortir par le sciphon pour leur donner leur action au juste, et y ayant plus de seureté d'en donner plus que moins, jl fault que le bacquet Γ soit percé par le fonds d'une legere ouuerture qui ne lempesche pas de semplir et qui aussy le vuide entierement quand le sciphon aura cessé de couler et le laisse remonter a son loisir vers H dou jl estoit partj.

Je croy qu'il seroit jnutile de vous dire comment la pendule communique son mouuement a l'horloge pour ce que Je croy que cela se peut faire en plusieurs manieres. Pour moy Je me sers du pied de bische dont Jay parlé icy dessus que Jatache sur le bout de l'axe triangulaire vers O. rencontrant les dens d'une Roue faictes en cramaillere quil pousse vne dent apres l'autre passant & se pliant par dessoubs celle quil veult pousser, et cette roüe a trente dens qui vallent chacune deux secondes. Et cest cette Roüe qui donne tout le mouuement a lhorloge, Jl y a quelque chose de particulier a l'axe de cette roüe pour la tenir en estat sans qu'elle puisse auancer ou reculer qu'autant que le pied de biche l'y obligera a n'auoir point ce quon appelle de jeu, Pour cet effect je fais ledict axe vn peu gros denuiron trois lignes de diametre et le pose d'un bout et dautre dans vn triangle dont la pointe est en bas affin que ledict axe appuyant sur les deux faces dudict triangle par le moyen de quelques poidz a discretion que Je mets dessus, ne puisse varier. Et Je ne fais pas

[p. 512]

peu destat de cette jnuention dont je croy l'usage fort vtile en plusieurs rencontres.

Jay aussy trouué moyen de remettre les aiguilles du cadran a lheure quil faudra sans y toucher et sans en aprocher, Ce qui se faict sans aucune difficulté en sorte que la personne la moins adroitte le pourra faire sans y manquer pourueu qu'elle sçache lheure quil est et quelle puisse connoistre les marques du cadran. Cette jnuention & celle de faire mouuoir la pendule me plaisent assez pource que par ce moyen lon pourra mettre vn horloge on lon voudra, au milieu du bassin d'vne fontaine de quelque grande quil puisse estre mesme dans vn estang ou autre lieu jnaccessible.

Je n'ay point voulu adjouster au crayon que Je vous enuoye celluy de cette derniere jnuention ny de la sonnerie de peur de faire de la confusion, outre que pour ce qui est de la sonnerie cest chose quil est aisé de s'jmaginer, neanmoins de la façon que je la fais jl n'y a que deux Roües y compris celle de compte, en quoy elle aproche dauantage de l'hydroligne.

Je ne vous diray point les raisons pour lesquelles Je croy que cette pendule sera juste vous les suplerez assez de vous mesme. Quelque jour j'en feray vne deduction plus particuliere que je vous communiqueray. Voyla Monsieur a quoy je me suis occupé depuis que vous nous auez quittez. Je m'jmagine toujours que quelque bonne pensée vous viendra de nous reuenir voir ces festes. Ce que je souhaitte de tout mon coeur, et les personnes que vous scauez, et qui sont encore jcy, Il dependra de vous de nous faire encore cette faueur, croyez moy cependant

Monsieur

Vostre treshumble & tresobeissant Seruiteur Perrault.

De Viry le xxviii octobre 1669.

J'ay dessiné mon modelle vn peu plus large et plus estendu quil ne l'est dans ses proportions pour vne plus facile jntelligence mais jmaginez vous qu'il n'a que quatre pieds de hault & sept a huict poulces despesseur auec 18 poulces de largeur.

A Monsieur

Monsieur Huggens de Zuylichem

A Paris.