Oeuvres complètes. Tome IV. Correspondance 1662-1663

N^o 1077.
P. Petit à [Christiaan Huygens].
17 novembre 1662.

La lettre se trouve à Leiden, coll. Huygens.

A Paris Le 17 Novembre 1662.

Monsieur.

Maintenant que je vous croys de retour de vostre petite guerre¹⁾ & que vous auez pris vostre quartier d'hyuer a la Haye jl faut sil vous plait restablir le Commerce des lettres & sentretenir des Curiositez a cette heure que nostre academie va recommencer chez Monsieur le Marquis de Sourdis²⁾. si Jen suis creu auec les Principaux en doctrine qui la composent nous nous porterons plus aux experiences des choses Physiques que par le passé, en quoy vous nous pourrez beaucoup ayder des vostres & verifier celles que nous ferons. Quant a la grande luneterie nous lavons laissee jusqua ce quil y eut lieu de sen seruir. Cepandant Je fais faire vn Moule de 100 pieds de diametre & vn de 80 sur des Circonferences que jay tracees de ces grandeurs auec vn gros sil de leton suspendu & vn boulet de Canon au bas portant le burin & traceant en pendule. Je ne croy pas quon puisse faire plus exactement ayant essaye plusieurs autres manieres. Et en attendant la Perfection de ces moules que je fais faire grands comme vous scauez, pour estre plus exacts Jay mandé a Venise des morceaux de Cristal fort espais que nous ne scaurions rencontrer icy auec les qualitez requises pour faire de bons verres. Car jl ny a plus que cela qui nous manqué estants

1) Petit fait allusion au séjour de Chr. Huygens à Zuylichem, où celui-ci s'était opposé aux manoeuvres des van Brederode.

2) Sur Charles d'Escoubleau, consultez la Lettre N^o. 484, note 3.

[p. 263]

si asseurez maintenant de la fabrique, et de la bonne Matiere pour doucir & polir, que les verres reussissent tous bons. Jay trouué vne facon de Poudre, autre que la potee du grais dont tout le Monde se sert a Paris, qui mange & doucit si parfaittement & sans deuenir grasse & pasteuse sur la fin quil ny a rien de semblable. Pour les petites lunettes et conuexes oculaires je me suis auisé ces Jours passez den faire faire deux douzaines par mon Valet sur vne Machine que jauois jl y a tres longtemps & que jauois tousjours negligee, & Jay trouué aussi par effect quelle nestoit bonne que pour les esbaucher mais non pas acheuer. & par ainsi Je leur ay fait donner la derniere main par nos ouuriers cest adire doucir & polir. Ce quils ont eu bien tost expedié le plus long dans ces verres conuexes estant de les user & donner la figure. Or de tous ces Conuexes presque differents de foyer & de grandeur despuis 10 lignes jusques a 40 Jay fait tant dessays en les combinant & triplant que Jen ay dressé vne grande table comme lon feroit de tous les Anagrammes possibles & Raisonnables de cinq ou six lettres, et puis en les appliquant a vn objectif excellent que jay fait de 3 pieds ½ jay trouué la vraye determination de leurs distances, jentends des oculaires qui nest pas precisement celle de leurs doubles foyers quand jl y en a trois ny de leur somme quand jl ny en a que deux.

Ensuitte Jay essayé si deux Conuexes comme vous mauiez dit autres foys faisoient mieux qu'un seul qui auroit la conuexité des deux & finalement quel auantage jl pourroit y auoir de mettre deux conuexes oculaires au lieu dvn de Mesme foyer, supposé quils fussent esgaux de grandeur, sur quoy Je vous diray quand jl vous plaira ce que jay trouué qui peut estre ne sera pas tout a fait la mesme chose que vostre derniere jnuention de lunette a Miroir. De laquelle comme on ma voulu faire croire que vous faisiez secret quoy que jaye bien pensé que ce ne seroit pas pour Moy qui suis trop vostre seruiteur que vous feriez Mystere & que je leur disse mesme que cette derniere lunette a Miroir³⁾ ne pouuoit differer des premieres que par la grosseur des tuyaux & par deux oculaires au lieu dvn dont mesme je leur montray par escrit la remarque que vous men auiez fait estant icy, Je ne vous en auois pas voulu escrire auant d'auoir fait tous les essays des lunettes a trois verres. Je vous diray donc que Mon Valet ayant trouué par rencontre vostre derniere lunette sous vn lict & layant apportee le soir par Curiosité affin de lessayer le lendemain matin sur ma terrasse comme luy & tous les autres font les miennes quand jl leur plaist, Monsieur Cheze me voulut faire passer cela pour vn aussi grand Crime & attentat que si c'eust esté de Mon ordre precis & quen cela jeusse offensé Monsieur vostre Pere vous & toute la famille huggeniene. Ce qu'apres auoir traitté de raillerie comme je croyois quil faisoit Je fus contraint de luy dire serieusement quil jugeoit fort mal de Moy & de mes actions & quen cela jl ne connoissoit ny ma candeur et probite ny les lumieres que jauois en ces matieres la, et

3) Consultez la Lettre N^o. 1069, note 4.

[p. 264]

quil deuoit sasseurer que si Je neusse pas cru dabord en voyant leffect de la lunette en pouuoir trouuer la cause Je vous leusse demandee comme Jay bien fait dautres choses daussi grande jmportance auec asseurance de nen estre pas refusé, si Jeusse eu Crainte que Messieurs vostre pere & frere me leussent desnié ou que Mesme je laurois fait prendre plustost ayant tousjours traisné soubs vn lict, si ma Curiosité eust este si violente, auant que den venir au point que Monsieur Cheze me vouloit jmputer qui estoit de lauoir fait prendre par mon valet de dessein & a cachettes. ainsi nous en demeurasmes la assez sechement. Et de Crainte que Monsieur vostre Pere ne prist la moindre jmpression a mon desauantage je luy escriuis comme laffaire sestoit passee & vous laurois aussi des lors escritte sans que vous estiez a la petite guerre & que je voulois acheuer toutes mes experiences.

Au reste Monsieur jay fait faire vn Moule de pierre pour mouler tant de petits & de grands miroirs en ouale que vous aurez besoin car je pense quils viendront mieux en pierre qu'en sable & je suis asseuré que les anciens mouloient ainsi les leurs plats. Jl nest acheué que despuis deux Jours, & Monsieur vostre frere & Moy y en auons desia fait de plomb les soirs en nous diuertissant. Pour les Microscopes a 3 verres Jay la Meilleure proportion & disposition qui se puisse rencontrer en ayant vn qui surpasse de beaucoup les meilleurs que nous eussions, & je lay donnee a Monsieur Auzout qui en va faire de mesme. si vous la desirez vous nauez qu'a ordonner pour vous abreger le temps de la chercher et trouuer, comme vous scauez que lon ne manque jamais de rencontrer ces choses & que ce que font les amys & gens de lettres les vns aux autres nest que de s'espargner le temps la peyne & la despense, en se communiquant ce quils ont fait de bien ou de Mal pour les empescher d'y tomber.

Quant aux pendules je me suis enfin resolu de faire faire deux nouuelles Roues au mien de 3 pieds. scauoir vne Roue de Champ & vne de Rencontre qui tourne horizontalement comme aux petits pendules affin de retrancher le pignon des palettes & la roue demy dentee. Et je ne doute point apres cela quelle ne chemine. Mais comme vous auez pratique en connoissance de ces matieres plus que personne & que Mesme on ma dit que certains ouuriers en Hollande auoient trouué quelque chose de nouueau & en faisoient non seulement de plusieurs semaines mais de plusieurs moys Je vous supplye de me mander ce qui en est et si vous me pouuez donner quelque auis salutaire pour Meliorer le mien soit pour la pesanteur des poids soit pour le pendule ou autres pieces. vous Mobligerez jnfiniment de le faire. Si ce nestoit vne Raillerie Je vous dirois qu'en Reuenche Je vous enuoyerois le secret des longitudes quand Monsieur Martinet⁴⁾ me lauroit communiqué. le pauure homme est si fol quil ma dit jl ny a pas encores deux jours lauoir trouué tres certainement par le Moyen dun horloge portatif & que sans aller sur Mer on en pourra faire lespreuue

4) Sur l'horloger Martinet, voir la Lettre N^o. 389, note 3.

[p. 265]

en courant la poste, quil ne sera pas plus gros quune boule de Mail & qua cause quil scait bien quon ne donné pas recompense aux jnuenteurs Jl ne demande autre chose sinon de vendre le premier quïl en fera 50 pistoles. Je luy dis que je voulois donc prendre pour Moy deux zero seulement que jadjousteray a sa demande & quil trauaillat hardyment que je luy trouuerois marchand. toutes ses propositions se terminent tousjours de mesme en paroles.

Pour les Commandemens dont je vous ay prié par mes precedentes je ne vous en parle pas croyant que vous en auez tout le soin que je peux attendre de lhonneur de vostre Amitié & que les liures d'heuelius⁴⁾ & autres nouueaux ny les fuseaux des globes celestes⁵⁾ ne seront point oubliez non plus que la figure de l'eglise de Saint Petrone que je vous ay enuoyé⁶⁾. Cepandant vous pouuez aussi croire tres certainement et je vous supplye den estre persuadé Mathematiquement cest a dire auec demonstration quil ny a personne au Monde qui vous estime plus que Moy & qui soit auec plus de tendresse & djnclination

Monsieur

Vostre Treshumble et tres Obeissant seruiteur P. Petit.

Je ne vous scaurois tesmoigner le desplaisir que jay de ce que Monsieur vostre Pere & toute sa compagnie⁷⁾ sen vont demain au faubourg Saint Germain⁸⁾. Jaurois souhaitte lhonneur de leur personne plus longtemps apres lauoir gousté ou de ne lauoir point gouste pour nauoir pas le desplaisir de le perdre.

4) Consultez les Lettres N^os. 1012, 1015, 1064 et 1069.

5) Consultez la Lettre N^o. 1069.

6) Voir la Lettre N^o. 1069.

7) Constantyn Huygens, père, avec son sils Lodewijk et Sebastian Chieze logeaient depuis quelque temps chez P. Petit. Consultez la Lettre N^o. 1069.

8) Ils y ont logé chez Monsieur Bailly, au Petit Moyse.