7166. Aan prins Willem III. (H.A.)
Le pauvre Zeelhem se desespere de veoir qu'au lieu des avantages ou chascun peut aspirer en bien servant il y a des gens qui tienent volontiers la main à le faire participer de la disgrace et de la mortification que d'autres peuvent avoir meritée par l'enormité de leurs excès. Choses dont il appert par l'exactitude de son registre exposé à V.A. en conscience et comme devant Dieu, qu'il a esté si peu complice, que mesme sa recepte n'approche point de ce que V.A. a bien voulu juger luy competer. Il est vray que ces Messieurs ont esté aucunement excusables d'un projet mal concen contre luy, tant qu'ils ont esté imbus avec la pluspart du monde, d'un revenu de 20 à 30 mille livres, qu'on luy attribuoit, pouvant conclurre qu'en rabattant les 2/3 d'une si grosse somme, il luy en resteroit assez pour ses peines; quoyqu'en effet il ne sied guere bien d'establir des reglemens à tastons, par un raisonnement vague et non appuyé de quelque faict verifié. Mais que, depuis l'abus si bien decouvert, on persiste à faire ou laisser souffrir l'interessé où il paroit qu'il n'a point forfaict, quelle apparence de raison?
Au nom de Dieu, Monseigneur, qu'il plaise à V.A. de se defaire de ces importunitez, et, si elle ne trouve à propos de laisser les choses dans l'ancien estat, qui seroit bien le plus court - quoyque rendant encor moins que ce qui est dudit jugement de V.A. - qu'elle vueille determiner à peu pres à quel salaire elle trouve juste et honorable que le secretaire de ses commandemens la serve
Auteursrecht onbekend