6666. Aan H. de Lionne. (K.A.)
Les gens du Parlement d'Orange ayans trouvé necessaire d'envoyer presenter les requestes dont un double va cy joint à Messieurs les intendans de la justice en Languedoc et Dauphiné, par deputez de leur corps, et obtenir sur icellles la response qui est au bas, en sorte qu'apparemment desjà lesdites requestes et papiers y appartenans seront arrivé à la cour, j'ay ordre de vous supplier tres-humblement, Monsieur, de vouloir tenir la main favorable à ce que lesdits Seigneurs intendans puissent recevoir les ordres et authorisations necessaires pour faire descharger nos nobles de produire autre chose que les certificats de leurs charges pour justification de leur noblesse, comme cela se prattique par les conseillers des Cours souveraines de France. La chose est si absolument juste, Monsieur, et a desjà esté trouvée telle par tant d'arrests et declarations de plusieurs de vos Cours, comme il vous paroistra par lesdits papiers, qu'on ne sçauroit doubter que le Roy ne condescende volontiers à maintenir et appuyer les interests de S.A. Monseigneur en une affaire qui en soy ne souffre aucune contradiction, pourveu, Monsieur, qu'il vous plaise prendre la peine de la luy representer avec la mesme affection que vous avez tousjours faict paroistre au bien de S.A..... 14 Juin 1668.
Auteursrecht onbekend