Briefwisseling. Deel 5: 1649-1663

6061. Aan W. Boreel¹⁾. (H.A.)

De l'humeur qu'est nostre Maistre Sire, il n'y a point de doubte, Monsieur, que d'abord il ne persiste à vous tesmoigner qu'il desire qu'on mette un gouverneur catholique. Mais j'espere que vous ne voudrez pas le laisser sans replique, en luy remonstrant que ni pour son regard ni pour l'interest des catholiques à Orange on n'a jamais donné aucun subject, pourquoy il puisse importer d'insister là dessus, les principaux s'offrans à attester qu'ils ont tousjours vescu ensemble avec ceux de la religion comme freres, et ce selon les ordres tres-expres de nos Princes. En ceste replique aussi il seroit bien à propos de donner à considerer au Roy le grand prejudice que S.A. reçoit chez nous de ce qu'on le void oppressé du costé d'où il debvoit esperer sa plus forte protection. Item, qu'il est tres-necessaire que je me rende à Orange au plus tost, parce qu'entre autres mille desordres causez par ces revolutions, il vient d'arriver advis qu'un jeusne enseigne de vingt ans qui y commande au nom du S.^r commandeur de Gaut, a faict arrester toutes les fermes sans qu'on en puisse retirer un sol, et menace les commis des fermiers de prison, qui les a tous obligez de prendre la fuitte; et que c'est ainsi que ce garçon abuse d'un acte que le Roy a donné depuis peu en faveur du thresorier Beauregard, à qui rien n'a esté refusé par la Tutele à laquelle il doibt rendre ses comptes, et asseurement en recevra toute faveur et justice, comme on luy a promis. Mais qu'apres tout personne ne peut aller donner ordre aux affaires du Prince que l'evacuation ne soit faicte de par le Roy. 7 Avril 1663.

1) Boven den brief staat: Envoyé à M. l'Ambassadeur Boreel, allant à l'audience.