Briefwisseling. Deel 5: 1649-1663

5608. Aan Frederik, Rhijngraaf. (K.A.)

Madame la Princesse Douariere m'a faict aujourdhuy communiquer au Conseil la lettre que V.E. luy a escritte le 19^e du courrant sur le subject du traicté de Herstal, par laquelle voyants que vous avez entendu de la bouche de M. l'Electeur qu'à Liege on demeure ferme sur l'offre de 130 m. r[ycx]dal[er] qui m'a esté faicte, on a esté estonné de veoir partir ceste declaration de ceux qui depuis tout le temps de mon depart n'ont pas daigné de faire entendre à leurs Alt.^es ce qui estoit de leurs intentions sur nos dernieres entrefaictes, là où cependant V.E. se peut souvenir qu'on m'avoit laissé partir avec promesse de nous faire avoir de leurs nouvelles, dès que ceux du Chapitre et autres membres de l'Estat, qui par la belle saison estoyent espars cà et là aux champs, seroyent revenus en ville, qui debvoit estre par le commencement de Septembre. Or, Monseigneur, puisqu'à la fin ces bons Seign.^rs ravisez font l'honneur à leurs A.A. d'ouvrir encor la bouche, on estime qu'il ne sera pas hors de propos de mesnager cest intervalle aveq discretion, et de sçavoir, si c'est tout de bon qu'on seroit d'advis de renouër le traicté, de quoy V.E. prenant la peine de se faire si bien esclarcir qu'on n'ayt plus à craindre des gabatines pareilles à ceste premiere, l'on pourroit prendre icy ses mesures à l'advenant, et resoudre avec leurs Alt.^es jusques où il seroit expedient de s'estendre. C'est ce qu'on a desiré que par avance je me donnasse l'honneur de faire connoistre à V.E. qui, j'espere, voudra se charger du soin de nous informer

[p. 319]

exactement de ce qu'elle aura observé et apprins sur ce subject, soit par le S.^r Mean¹⁾, ou par telle autre voye qu'elle trouvera convenable ..... 21 Avril 1659.

1) Zie blz. 290.