Briefwisseling. Deel 4: 1644-1649
(1915)–Constantijn Huygens–
Auteursrecht onbekend4477. A. RivetGa naar voetnoot4). (L.B.)J'ay esté ravi d'avoir par le moyen des lettres de son Altesse et des vostres subjet de r'appeller Monsieur de Saumaise a sa principale tasche. Car quoyqu'il n'estime pas les petis argumens ausquelz on le tire pour des sotises, je les tiens neantmoins telles en comparaison de ceux qu'il pourroit traicter avec beaucoup plus de fruict, et ne suis pas marri que ces mots l'ayent un peu piqué, qui ne regardent que les sotises et pedantismes de ceux qui le divertissent. Je vous envoye l'apologie asséz longue que je reçeu hier au soir, tellement couchée que j'ay creu qu'il vouloit bien qu'on la vist. Si vous jugéz a propos que son Altesse la voye, a laquelle j'en escri en termes generaux, | |
[pagina 360]
| |
vous la luy pourréz lire. Tant y a que nous avons cet advantage qu'il s'oblige par escrit a ne plus entreprendre autre ouvrage, et l'imprimeur ne demande qu'a continuer. Pour la bibliotheque de Breda, j'eusse esté de mesme advis que vous, sans que j'ay veu de la difficulté a cause de ces sieges en menuiserie qui sont un ornement du lieu, et ne pouvoient estre commodément transferéz ailleurs. Il y a aussi aux deux costéz de quoy garnir les murailles. Je suis en peine du transport et changement de la mienne, me trouvant chargé de plus de huit cents volumes in folio, d'ou par proportion vous pouvéz juger des 4o, 8o, 12o et 16o. On m'a pourveu d'une maison que j'ay veuë et agreée, en laquelle j'auroy plus d'espace qu'ici, et la promenade d'un jardin asséz spacieux pour moy. Puisqu'en ce changement et en cet aage de ma vie il a plu a leurs Altesses m'ordonner un sejour auquel je puis continuer mon service a Dieu, et leur rendre celuy que je leur doibs en la sphere de mon activité, je me dispose allegrement a mon desmenagement mesme devant l'hyver, ne desirant rien plus sinon qu'avant partir je reçoive les ordres et commandemens de la bouche de son Altesse, et de la vostre vos bons et prudens conseilz, et me consolant en ce que la charge qu'il a plu a son Altesse nous commettre, vous obligera a quelques visites, ausquelles j'auray l'honneur et le contentement de travailler avec vous, que je doibs reputer a grand honneur d'avoir pour collegue en icelle ..... De la Haye, le 24 Octob. 1646. Les Elzevirs impriment in 4o en fort belle lettre et beau papier la vie de feu Monsieur du PlessisGa naar voetnoot1), qui contient une histoire de plus de soixante ans, en laquelle il y a des particularitéz notables sur les evenemens des temps, qui ne se trouvent ailleurs escrites si au vray. Feu Monseigneur le Prince d'Orange Pere y a bonne part en plusieurs lieux. Elle sera suivie des lettres et memoires dudit sieur que j'ay a present en main, depuis l'an 1600 jusques a l'an 1623 auquel il mourut, ou il y a bien plus de matiere qu'es precedens, et ou toute l'histoire de ce temps là trouvera grande clarté. L'Histoire de la vie sera achevée dans deux mois, et sera de quatre signatures. |
|