Briefwisseling. Deel 4: 1644-1649

4207. Aan prinses Amalia van Oranje. (H.A.)*

Comme la saison des nouvelles se passe, ma diligence est contraincte de se rallentir. Nous ne sommes apres qu'à raser des forts. A quoy jusques ores il nous est force d'employer nos soldats, les païsans du païs de Waes tardans à venir, et tantost se targans (?) d'une excuse, tantost d'une autre, si bien qu'enfin ce viendra à leur faire fournir de l'argent, qui en tout ne pourra monter qu'à quatre ou cinq mil livres.

Hier au matin ceux du Moerspuij sortirent, en tout bien 350 hommes aveq trois pieces. Aujourdhuy S.A. a esté veoir ce fort, qui de vray n'est pas du tout achevé, quant à ce qui est de la contrescarpe, pont, et choses semblables, mais en soy est une piece royale de cinq bastions, entourrez d'un fossé aussi large que celuy de Hulst. De sorte qu'aveq nostre pont et tout l'on y auroit encor bien rencontré de la difficulté, si les assiegez eussent eu le courage proportionné à leurs ouvrages. Il me semble qu'un de nos bons officiers respondit fort bien au capitaine des leurs, qui s'estoit laissé chasser mal à propos du dernier et plus important ouvrage, et cependant vouloit comme nous reprocher de ce que nous avions tant mis de jours à en venir jusques là, où nous pouvions avoir logé dès la premiere nuict, disant ledit officier: il est vray, Monsieur, et nous l'eussions faict, si nous eussions sceu que nous n'avions à faire qu'à des gens comme vous. Dans ce fort S.A. loge une compagnie de Mauritsfort, une de Berghe, une du Polder de Namur, et une du païs de Tergoes, et dans celuy de S.^t Marcq une d'Axelle. Celuy de Frangipane, qui suit apres le Moer-

[p. 258]

spuij, sur un canal magnifique, qui va de là à Moerbeke, et dont le Moerspuij eust esté comme le nouveau Sass de Gant, la grande escluse s'y trouvant desjà fondée, a esté condamné à estre rasé demain, quand aussi M. le comte Guillaume, qui en ceste gagliarde occasion a donné une excellente marque de sa valeur et vigilance, s'en reviendra vers son viel quartier aveq ses trouppes, desquelles on dit qu'il n'y a eu de perdu que sept hommes seulement. - Dimanche qui vient, si S.A. ne change d'advis, toute l'armée s'embarquera. - Ceste nuict M. le comte Maurice a esté envoyé recognoistre le païs et la ville de Dendermonde aveq 600 chevaulx, et sans autre rencontre que d'avoir pris les deux sentinelles au deçà du pont de l'Escault - pardelà on tient qu'il y a bien 4000 chevaulx, ceux de Lorraine s'y estans joincts - n'est¹⁾ venu faire rapport de son voyage qu' aujourdhuy vers le soir, le chemin estant bien de sept heures d'icy là seulement. - Ce mesme soir nous venons de tirer les trois salves de victoire le long de ceste circonvallation, qui a esté belle chose à veoir, mais que nous croyons n'avoir esté ouye ny à Gant ny à Anvers, quelque proches qu'ils nous soyent, et en diverse assiette, le vent du Suydoost en ayant empesché l'une et l'autre de ces voisines, que nous avions faict estat de convier à ce festin devant toutes autres. Au camp de Hulst, le 16^e Novemb. 1645.

1) Er staat: et n'est